Jalgaon Municipal Corporation : जळगाव महापालिकेच्या प्रभागरचनेवर हरकतींचा पाऊस, चार दिवस चालणार सुनावणी

Jalgaon News : जळगाव महापालिकेच्या प्रभागरचनेवर रविवारपर्यंत ४५ हरकती दाखल झाल्या होत्या. शेवटच्या दिवशी सोमवारी तब्बल २४ हरकती दाखल झाल्या. आतापर्यंत एकूण ७० हरकती दाखल झाल्या आहेत. आज मंगळवार (दि. 16) पासून या हरकतींवर सुनावणी सुरु झाली असून पुढचे चार दिवस सुनावणी होणार आहे.

महापालिकेने निवडणुकीसाठी 3 सप्टेंबरला प्रारूप प्रभागरचना जाहीर केल्यानंतर नागरिकांना १५ सप्टेंबर पर्यंत हरकती घेण्याची मुदत दिली होती. त्यानुसार १५ सप्टेंबरपर्यंत हरकती व सूचना मागविण्यात आल्या होत्या. काल दिलेली मुदत संपल्याने आता या हरकतींवर पुढचे चार दिवस सुनावणी घेतली जाणार आहे.

१३ दिवसांत ७० हरकती प्राप्त झाल्या असून, त्यानुसार १६ ते १९ सप्टेंबरदरम्यान या हरकतींवर सुनावणी पार पडेल. पहिल्या दिवशी एकुण ७० हरकतींपैकी २० हरकतींवर सुनावणी होणार आहे. तर त्यानंतर तीन दिवसांत प्रत्येकी १७ हरकतींवर सुनावणी केली जाईल.

जिल्हाधिकारी यांनी या सुनावणीसाठी उपजिल्हाधिकारी अर्चन मोरे यांना प्राधिकृत केलेले आहे. त्यांच्यासह महापालिका आयुक्त ज्ञानेश्वर ढेरे, उपायुक्त निर्मला गायकवाड, नगररचनाकार अमोल पाटील, अभियंता योगेश वाणी यांच्यासह अन्य अधिकारी वर्ग हे सुनावणी घेणार आहेत. (Jalgaon News)

हरकती सूचनांवर सुनावणी झाल्यानंतर शिफारशी विचारात घेऊन प्राधिकृत अधिकारी यांनी केलेली प्रभाग रचना महापालिका नगरविकास विभागास सादर २३ सप्टेंबरला सादर करणार आहे. त्यानंतर नगरविकास विभाग राज्य निवडणूक आयोगास प्रभाग रचनेचा अहवाल सादर करतील. त्यानंतर ९ ते १३ ऑक्टोबर या काळात निवडणूक आयोग यांनी अंतिम केलेली प्रभागरचना जाहीर केली जाईल.