Nashik Crime : नाशिकमधील माजी जिल्हापरिषद सदस्यासोबत काय घडलं? आठ दिवसांनी नाल्यात सापडली बॉडी...

Nashik News : नाशिकच्या पळसे गावात एक धक्कादायक घटना समोर आली आहे. जिल्हा परिषदेचे येथील माजी सदस्य कैलास किसन चौधरी (वय ५०) हे आठ दिवसांपासून बेपत्ता होते. त्यांचा शोध सुरु असतानाच कुजलेल्या अवस्थेतील मृतदेह गुरुवारी (ता. १८) पळसे गावालगत असलेल्या नैसर्गिक नाल्यात आढळून आल्याने एकच खळबळ उडाली. चौधरी हे शिवसेनेकडून २००७ मध्ये जिल्हा परिषदेवर निवडून गेले होते.

कैलास चौधरी असं मृत माजी सदस्याचं नाव असून ते ११ डिसेंबरला पहाटे पळसे येथील आपल्या घरातून कोणालाही काहीही न सांगता निघून गेले होते. त्यानंतर ते परत न आल्याने नातेवाइकांनी नाशिक रोड पोलिस ठाण्यात ते बेपत्ता झाल्याची तक्रार केली होती. त्यानुसार पोलिसांकडून त्यांचा शोध सुरू होता.

राजवाडा परिसरातील नाल्यात येथील एका स्थानिक महिलेला एक मृतदेह दिसून आला, आणि ही बातमी वाऱ्यासारखी पसरल्यानंतर एकच खळबळ उडाली. महिलेने आरडाओरड केल्यावर नागरिकांनी घटनास्थळी धाव घेत पोलिसांना माहिती दिली. पोलिसांनी तेथे पाहणी केली असता तो मृतदेह जिल्हा परिषदेचे माजी सदस्य कैलास चौधरी यांचाच असल्याचे निष्पन्न झाले. (Nashik News)

मृतदेहाजवळ आढळलेली चप्पल, शर्ट याच्या आधारावर, मृतदेहाची ओळख कैलास चौधरी यांच्या मुलाने आणि गावातील प्रतिष्ठित नागरिकांनी पटवून दिली. त्यांच्या मृत्यूचे नेमके कारण विच्छेदन अहवालानंतर स्पष्ट होणार आहे. मात्र या घटनेमुळे पळसे परिसरात शोककळा पसरली असून, नागरिकांमध्ये हळहळ व्यक्त होत आहे. नाशिक रोडचे वरिष्ठ पोलिस निरीक्षक जितेंद्र सपकाळे यांच्या मार्गदर्शनाखाली तपास सुरू आहे.

कैलास चौधरी यांनी २००७ मध्ये शिवसेनेकडून पळसे गटातून अनुसूचित जमाती या राखीव जागेवर जिल्हा परिषदेची निवडणूक लढवली होती. त्या निवडणुकीत ते भरघोस मतांनी विजयी झाले होते. त्यांच्या मागे पत्नी, मुलगा व मुलगी असा परिवार आहे. दरम्यान चौधरी यांच्या मृत्यूमागचं नेमकं कारण काय? हा अपघात आहे की घातपात? याचा तपास नाशिकरोड पोलीस करत आहेत.