Kirit Somaiya Politics: बांगलादेशी नागरिक सापडेनात, किरीट सोमय्यांचा मोर्चा आता महापालिका आयुक्तांकडे!

Kirit Somaiya News: भाजप नेते किरीट सोमय्या गेली वर्षभर महाराष्ट्रातील मुस्लिम बहुल शहरात दौरे करीत आहेत. या शहरांमध्ये मोठ्या प्रमाणावर बांगलादेशी नागरिक राहत असल्याचा आरोप त्यांनी केला होता. मात्र अद्याप एकही बांगलादेशी नागरिक सापडलेला नाही.

भाजप नेते किरीट सोमय्या गेल्या वर्षभर मालेगाव हे बांगलादेशी नागरिकांचे माहेरघर असल्याचा दावा करत होते. त्यासाठी सोमय्या यांनी महापालिका आणि तहसीलदार कार्यालयात अनेक जन्मदाखले सादर केले. हे दाखले बांगलादेशी नागरिकांचे असल्याचा दावा सोमय्या यांनी केला होता.

या संदर्भात थेट मुख्यमंत्री देवेंद्र फडणवीस यांच्याशी संपर्क केल्यावर विशेष तपासणी पथक (एसआयटी) स्थापन करण्यात आली होती. विशेष पोलीस महासंचालक दत्तात्रय कराळे यांच्या नेतृत्वाखालील या समितीने मालेगाव शहरातील घरोघर जाऊन तपासण्या केल्या. एवढे सगळे करूनही अद्याप एकही बांगलादेशी नागरिक न सापडल्याने आता हा राजकीय वादाचा विषय बनला आहे.

सोमय्या यांनी मंगळवारी पुन्हा एकदा मालेगाव शहराला भेट दिली. १०४४ दाखले बनावट आहेत. त्यामुळे हे दाखले देणाऱ्या महापालिका आयुक्त रवींद्र जाधव यांच्यावर कारवाई करण्यात येणार आहे. बाबत राज्याचे मुख्य सचिव यांनी त्याची माहिती घेण्याचे काम सुरू केल्याचा दावा केला.

सोमय्या यांच्या या डावपेचाला शहरातील माजी आमदार रशीद शेख आणि समाजवादी पक्षाचे नेते मुस्तकीन डिग्निटी यांचं विविध नेत्यांनी प्रत्युत्तर दिले आहे. किरीट सोमय्या हे मालेगाव शहराला बदनाम करीत आहेत. त्यांनी आरोप केलेल्या एकही दाखल्यातील नागरिक बांगलादेशी आढळलेला नाही. त्यामुळे नाचक्की झालेले सोमय्या आता अधिकाऱ्यांवर दबाव आणण्याचा प्रयत्न करीत आहे.

या संदर्भात शहरातील राजकीय नेत्यांनी महापालिका आयुक्त आणि अन्य अधिकाऱ्यांच्या मागे आपले बळ उभे केले आहे. सोमय्या यांच्या दबावाला बळी न पडता अधिकाऱ्यांनी ठाम राहावे. सोमय्या करीत असलेल्या आरोपांमध्ये कोणतेही तथ्य नाही, असे आवाहन माजी आमदार शेख यांनी केले आहे.

किरीट सोमय्या यांनी मालेगाव सह औरंगाबाद, भिवंडी, धुळे, सिल्लोड यांसह विविध शहरांचे दौरे करून सणसणाटी आरोप केले होते. सोमय्या यांच्या मागे उभे करण्यात आलेले प्रशासकीय अधिकारी आणि यंत्रणा नाही आता या आरोपांनी त्रस्त झाल्याचे चित्र आहे. त्यामुळे मालेगाव प्रकरणात सोमय्या यांनाही यु टर्न घेत बांगलादेशी नागरिक हा मुद्दा सोडून बनावट दाखले तपासणीची मागणी करावी लागत आहे. त्यामुळे तो चर्चेचा विषय ठरला आहे.

-------