Eknath Khadse : चाकणकरांनी जावयाच्या मोबाईमधील डेटा बाहेर काढताच खडसे संतापले, म्हणाले, "सोयीनुसार महिलांची बदनामी..."

Eknath Khadse vs Rupali chakankar : पुण्यातील रेव्ह पार्टी प्रकरणावरून रोज नवा वाद निर्माण होत आहे. यामध्ये महिला आयोगाच्या अध्यक्षा रूपाली चाकणकर यांनी रोहिणी खडसे यांचे पती प्रांजल खेवलकर यांच्या मोबाईलमधील अश्लील डेटा बाबत माहिती दिली होती.

यावरून आता एकनाथ खडसेंनी चाकणकर यांना चांगलेच फैलावर घेतले आहे. महिला आयोगाचे अध्यक्ष रूपाली चाकणकर आणि राष्ट्रवादी काँग्रेस शरदचंद्र पवार पक्षाच्या महिला आघाडीच्या अध्यक्षा रोहिणी खडसे यांच्यातील राजकीय सख्य सर्वश्रुत आहे.

डॉ. खेवलकर हे रोहिणी खडसे यांचे पती असल्यामुळे चाकणकर यांच्या हाती आयतेच राजकीय खोलीत सापडले आहे. या संधीचा राजकीय लाभ चाकणकर यांनी उचलला आहे. या प्रकरणावरून राष्ट्रवादी काँग्रेसचे नेत्या खासदार सुप्रिया सुळे यांनी देखील दिल्ली येथे आपली भूमिका स्पष्ट केली आहे.

त्यांनी चाकणकर यांच्या वक्तव्यावर गंभीर प्रश्न उपस्थित केला होता. या प्रकरणात गोपनीय माहिती बाहेर जाहीरपणे सांगणे हे व्यक्तिस्वातंत्र्याचे उल्लंघन आहे. सर्वोच्च न्यायालयाचे निवाडे, संसद आणि राज्यघटना या सगळ्यांचेच त्याने उल्लंघन झाले आहे. त्यामुळे कायदेतज्ञ असलेले मुख्यमंत्री याबाबत काय भूमिका घेणार असा सवाल खासदार सुळे यांनी केला होता.

या पार्श्वभूमीवर माजी मंत्री एकनाथ खडसे यांनी रूपाली चाकणकरांना चांगलेच फैलावर घेतले आहे. चाकणकर या एका न्यायप्रविष्ठ प्रकरणावर आक्षेपार्ह माहिती देत आहेत. त्यांच्याकडे कुठल्या महिलेने तक्रार केली आहे का? कोणाचीही तक्रार नसताना मोबाईलमधील डेटा आणि अन्य माहिती चाकणकर कशी काय जाहीरपणे सांगत आहेत.

त्या तपास अधिकाऱ्यांच्या भूमिकेत केव्हा आल्या? असा सवाल खडसेंनी केला आहे. चाकणकर या राजकीय हेतूने या प्रकरणाचा दुरुपयोग करीत आहे. राज्यात अनेक गंभीर प्रश्न आणि समस्या आहेत. त्यात महायुती सरकारची चांगलीच अडचण झाली आहे.

विशेषता हनी ट्रॅप, प्रफुल्ल लोढा यांना झालेली अटक आणि मंत्री गिरीश महाजन प्रकरणावर चाकणकर यांनी मौन का धारण केले आहे? या विषयावर त्या सोयीची भूमिका का घेतात? असा प्रश्न खडसे यांनी केला. खडसे म्हणाले, रूपाली चाकणकर या प्रकरणात निराधार दावे करीत आहेत.

हे प्रकरण न्यायप्रविष्ठ आहे. त्यातील तपासात काय सापडले? काय माहिती मिळाली? हे बाहेर येण्याचे काहीच कारण नाही. तरीही चाकणकर आपल्या सोयीनुसार आणि काही महिलांची आणि विरोधकांची बदनामी होईल अशी विधाने करीत आहेत. त्या तपास अधिकाऱ्याच्या भूमिकेत केव्हा गेल्या? असा प्रश्न त्यांनी केला.