Satyajit Tambe News : आमदार तांबेंचा राज्य सरकारला सज्जड इशारा

Sangamner News : सरकारने शिक्षणावर खासगीकरण, कंत्राटीकरण असे वेगवेगळे प्रयोग करत शिक्षणाची प्रयोगशाळा करून टाकली आहे. या प्रयोगांवरून नाशिक पदवीधरचे आमदार सत्यजित तांबे (Satyajeet Tambe) हे राज्य सरकारवर कडाडले आहेत. शिक्षणात चुकीचे धोरण राबवू नका, असा सज्जड इशारा देत शिक्षणातील खासगीकरण आणि कंत्राटीकरणाविरोधात संगमनेरमध्ये काढलेल्या विराट मार्चात आमदार सत्यजित तांबे सहभागी झाले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

शिक्षणातील खासगीकरण, कंत्राटीकरण, समूह शाळा अशा वेगवेगळ्या निर्णयांविरोधात संगमनेरमध्ये जनआक्रोश मोर्चाचे आयोजन करण्यात आले होते. यशोधन कार्यालय ते प्रांताधिकारी कार्यालयापर्यंत हा मोर्चा काढण्यात आला होता. माजी आमदार डॉ. सुधीर तांबे, नगराध्यक्ष दुर्गा तांबे, माजी खासदार भाऊसाहेब वाघचौरे, प्राचार्य हिरालाल पगडाल, प्रा. भाऊसाहेब चासकर, छात्र भारतीचे अनिकेत घुले यांच्यासह दहा हजार विद्यार्थी मोर्चात सहभागी झाले होते. मोर्चात सहभागी झालेल्या विद्यार्थ्यांनी सरकारविरोधात केलेल्या घोषणाबाजीमुळे प्रांताधिकारी कार्यालय दणाणले होते.

आमदार तांबे म्हणाले, "शिक्षण हा मूलभूत अधिकार आहे. गोरगरीब, आदिवासी, शेतमजूर यांच्या मुलांचा शिक्षणाचा हक्क चुकीच्या धोरणातून हिरावून घेत आहे. सरकारने (State Government) शिक्षणाची प्रयोगशाळा तातडीने थांबवावी, अन्यथा मुंबईपर्यंत धडक मोर्चा काढण्यात येईल."

माजी आमदार तांबे (Dr. Sudhir Tambe) यांनीदेखील शिक्षणावरील खर्च कमी करण्यासाठी अनेक चुकीचे निर्णय सध्याचे सरकार घेत आहे. राज्यात शिक्षकांच्या हजारो जागा रिक्त आहेत. आदिवासी-वाडी वस्तीवरील शाळा बंद करून समूह शाळा करण्याचा घाट म्हणजे राज्यातील सुमारे दोन लाख विद्यार्थी शिक्षणापासून वंचित राहतील.

त्यामुळे सरकारने तातडीने हे निर्णय रद्द करावेत, अशी मागणी केली. सरकारच्या या निर्णयाविरोधात काँग्रेसचे नेते आमदार बाळासाहेब थोरात (Balasaheb Thorat) यांनीदेखील आक्रमक भूमिका घेतली आहे. त्यांचाही या मोर्चाला पाठिंबा असल्याचे माजी आमदार डॉ. सुधीर तांबे यांनी सांगितले.

Edited by : Amol Jaybhaye