Nandurbar Politics : नंदुरबार का किंग कौन? गावित विरुद्ध सगळे अशीच लढत; चंद्रकांत रघुवंशी उतरले रणांगणात!

Nandurbar News : नंदुरबार जिल्ह्यात चारही नगरपालिका निवडणुकीसाठी भाजप स्वबळावर निवडणूक लढणार आहे. माजी मंत्री डॉ विजयकुमार गावित यांनी हा राजकीय प्रतिष्ठेचा प्रश्न केला. त्यामुळे महायुती प्रत्यक्षात आलीच नाही.

शिवसेना शिंदे पक्षाकडून आमदार चंद्रकांत रघुवंशी यांनी निवडणुकीची मोर्चे बांधणी केली. त्यात प्रामुख्याने भाजपचे माजी मंत्री डॉ गावित यांच्या विरोधकांना एकत्र केले होते. त्यामुळे दोन्ही नेत्यांना मनापासून एकत्र यायचे होते का? असा प्रश्न निर्माण होतो आहे.

केंद्रीय राज्यमंत्री रक्षा खडसे यांची नंदुरबारच्या निवडणूक निरीक्षकपदी नियुक्ती झाली. पक्षाचे प्रदेश सचिव विजय चौधरी यांनी राजकीय वाटाघाटीसाठी प्रयत्न केले. मात्र यामध्ये मुख्य भूमिका जिल्ह्याचे नेते माजी मंत्री डॉ गावित आणि माजी खासदार डॉ हिना गावित यांचीच राहील.

आमदार रघुवंशी यांनी डॉ. गावित यांच्याकडे सन्मानजनक प्रस्ताव दिल्यास युतीची तयारी दाखविली होती. प्रत्यक्षात मात्र भाजप स्वबळावर निवडणूक करणार हे माजी मंत्री डॉ गावित यांनी आधीच जाहीर केले होते. त्यांनी हे मनसुबे तडीस नेले आहेत.

शिंदेंच्या शिवसेनाही गाफिल न राहता जमवा जमव करत होती. माजी आमदार शिरीष चौधरी यांनी शिवसेनेत प्रवेश केला. भाजपचे डॉ. विक्रांत मोरे यांना देखील आमदार रघुवंशी यांनी आपल्या गोठात सामील केले होते. नवापूरला भरत गावित यांनी आपली ताकद लावली आहे.

या सर्व घडामोडी जिल्ह्याच्या राजकारणामुळे शिवसेना विरुद्ध भाजप अशी लढत होणार आहे. नंदुरबारचे राजकारणात माजी मंत्री डॉ गावित यांनी प्रदीर्घकाळ आपले वर्चस्व ठेवले आहे. त्यात त्यांनी सर्वच विरोधकांना वेळोवेळी डिवचले होते. त्यामुळे नगरपालिका निवडणुकीतही गावित विरुद्ध अन्य सर्व हे चित्र अपेक्षित होते. आता ते प्रत्यक्षात आले आहे. या सर्व घडामोडींमध्ये काँग्रेस मात्र चाचपडताना दिसत आहे.