NCP Politics : "आता शरद पवार यांनीच पुढाकार घ्यावा..."; नरहरी झिरवाळ यांचं मोठं वक्तव्य

Nashik News, 31 Jan : उपमुख्यमंत्री अजित पवार यांच्या निधनानंतर राजकीय पेच निर्माण झाला आहे. राष्ट्रवादी काँग्रेस पक्षाच्या विविध नेत्यांनी यावर सावध भूमिका घेतली आहे. त्यामुळे आजच्या राजकीय घडामोडींकडे सगळ्यांचे लक्ष आहे.

उपमुख्यमंत्री अजित पवार यांचा अभिमान अपघातात दुर्दैवी मृत्यू झाला. त्यानंतर अजित पवार यांच्या राजकीय वारसदार कोण यावर विविध नेते सावध भूमिका घेत आहेत. आज या संदर्भात पक्षाच्या आमदारांची बैठक होत आहे.

या पार्श्वभूमीवर राज्याचे अन्न व औषध प्रशासन मंत्री नरहरी झिरवाळ यांनी मोठे विधान केले आहे. उपमुख्यमंत्री पवार यांच्या निधनाने कार्यकर्ते आणि नेते यांच्यात पोरकेपणाची भावना आहे. ही स्थिती लवकर दूर व्हावी.

दोन्ही राष्ट्रवादी काँग्रेस पक्ष एकत्र येण्याची प्रक्रिया यापूर्वीच सुरू झाली आहे. जिल्हा परिषद निवडणुकीत उमेदवार देण्याबाबत काही निर्णय झाले आहेत. त्यामुळे ही प्रक्रिया निश्चितपणे पूर्ण होईल, यात शंका नाही.

या संवेदनशील आणि गंभीर परिस्थितीत ज्येष्ठ नेते शरद पवार यांनीच पुढाकार घ्यावा. कदाचित ते तसा निर्णय घेतील. त्यातून दोन्ही राष्ट्रवादी काँग्रेस पक्षाच्या पदाधिकाऱ्यांना आणि कार्यकर्त्यांना दिलासा मिळेल.

राष्ट्रवादी काँग्रेस पक्षाच्या दोन्ही गटांनी एकत्र यावे ही जनतेची इच्छा आहे, असा दावा झिरवाळ यांनी केला. यासंदर्भात अजित पवार यांनी जाहीर भूमिका घेतलेली होती. राज्याच्या विकासासाठी आणि राजकीय स्थिरतेसाठी त्याची आवश्यकता आहे, असेही झिरवाळ यांनी सांगितले.

दरम्यान राष्ट्रवादी काँग्रेसमध्ये राजकीय घडामोडी वेगात आहेत. राष्ट्रवादी काँग्रेस अजित पवार पक्षाच्या आमदारांची बैठक आज मुंबईत होत आहे. यासंदर्भात काही नेत्यांनी काल मुख्यमंत्री देवेंद्र फडणवीस यांची भेट घेतली होती. त्यानंतर या हालचाली वाढल्या. आज श्रीमती सुनेत्रा पवार यांची गटनेतेपदी नियुक्ती होण्याची शक्यता आहे. या पार्श्वभूमीवर झिरवाळ यांच्या भूमिकेला महत्त्व आहे.