Ajit Pawar Death : नाशिक जिल्ह्याने दादांना सात आमदार दिले, दादा मोठ्या मनाचे.. त्यातल्या तिघांना मंत्री केले

Ajit Pawar Nashik : उपमुख्यमंत्री अजित पवार यांचे नाशिक जिल्ह्यावर काका शरद पवार यांच्याप्रमाणेच खूप प्रेम होतं. तितकच प्रेम नाशिककरांनीही दादांवर केलं. पंधरा पैकी तब्बल अर्धे म्हणजे सात आमदार नाशिक जिल्ह्याने राष्ट्रवादीला दिले. त्यातूनच दादांनी नाशिकच्या ग्रामीण भागातील राजकारणात प्रस्थ वाढवले.

विधानसभा निवडणुकीत राष्ट्रवादीचे(अजित पवार) राज्यात सर्वाधिक सात आमदार नाशिकमध्ये निवडून आणत दादांनी आपली ग्रामीण राजकारणातील पकड सिद्ध केली. विशेष म्हणजे दादांच्या नेतृत्वाला नाशिकची कायम साथ लाभली. नाशिकसोबत दादांचे जुने ऋणानुबंध राहिले.

नाशिकवर दादांचे विशेष प्रेम होते. नाशिककरांनी दादांना तब्बल सात आमदार दिले. त्यामध्ये देवळाली विधानसभा - सरोज अहिरे, कळवण विधानसभा - नितीन पवार, येवला विधानसभा - छगन भुजबळ, सिन्नर विधानसभा - माणिकराव कोकाटे , निफाड विधानसभा - दिलीप बनकर , दिंडोरी विधानसभा - नरहरी झिरवळ , इगतपुरी विधानसभा - हिरामण खोसकर हे दादांचे नाशिकमधील सात शिलेदार होते. ज्यांना नाशिककरांनी आमदार केलं आणि दादांचे हात राज्याच्या राजकारणात बळकट केले.

यातील तीन जणांना दादांनी कॅबिनेट मंत्री केलं. त्यामध्ये माणिकराव कोकाटे यांना कृषीमंत्री, नरहरी झिरवाळ यांच्याकडे अन्न व औषध प्रशासन तर छगन भुजबळ अन्न व नागरी पुरवठा मंत्री पद दिलं. राज्यात सर्वाधिक आमदार नाशिकमधून निवडून आल्याने पक्षाच्या वाट्याला आलेल्या मंत्रीपदातील मोठा हिस्सा नाशिकला देत दादांनी कृतज्ञता व्यक्त केली. तसेच राज्यस्तरावर नाशिकचे महत्व वाढवले. तब्बल सात आमदार व तीन कॅबिनेट मंत्रिपदे असल्याने राष्ट्रवादी कॉंग्रेसचे नाशिक जिल्ह्यात वर्चस्व निर्माण झाले. नाशिक जिल्ह्याला दादांचा बालेकिल्लाच बनला.

म्हणूनच उपमुख्यमंत्री अजित पवार यांचे निधन नाशिकचे आमदार, पदाधिकारी, कार्यकर्ते यांच्यासाठी वेदनादायी ठरले. अजित दादा विविध कार्यक्रमांच्या निमित्ताने नेहमी नाशिकला येत. नुकत्याच झालेल्या नगरपरिषद निवडणुकांच्यावेळीही दादांच्या नाशिक जिल्ह्यात सभा झाल्या. नाशिकच्या भगूर, ओझर व पिंपळगाव बसवंत येथे जाहीर सभा झाल्या. अजित दादांच्या एका सभेने भगूरच्या राजकारणात तब्बल २५ वर्षांनी सत्तांतर झालं. दादांनी आवाहन केल्याने राष्ट्रवादीच्या प्रेरणा बलकवडे यांच्या रुपाने भगूरमध्ये राष्ट्रवादी कॉंग्रेस व भाजप युतीचा नगराध्यक्ष विराजमान झाला.

नगरपरिषद निवडणुकांच्या काळात उपमुख्यमंत्री अजित पवार यांचा झालेला दौरा हा नाशिकचा अखेरचा दौरा ठरला. आता दादा परत कधीच आपल्या बालेकिल्ल्यात अर्थात नाशिकमध्ये दिसणार नाही हे ऐकुण जिल्हावासीयांच्या डोळ्यात कडा पाणावल्या. स्वपक्षासह अगदी मित्र व विरोधी पक्षातील आमदार, पदाधिकारी, कार्यकर्ते या सगळ्यांनीच त्यांच्या आठवणींना उजाळा दिला.