Nashik APMC Election: पिंगळे, चुंभळे लढतीत प्रचाराच शेवटपर्यंत दहशतीची चर्चा!

APMC Election : नाशिक बाजार समितीची निवडणुकीत चर्चेत आली ती काँग्रेसचे आमदार हिरामण खोसकर यांना दमबाजी झाल्याने. सबंध प्रचारात त्याची चर्चा होती. प्रचाराचा शेवट देखील श्री. चुंभळे यांनी माजी नगरसवेक शिवा भागवत यांना दमबाजी केल्याने झाली. याबाबत पोलिसांत दोन तक्रारी दाखल असल्याने या निवडणुकीत मतदारांच्या ते लक्षात राहील. (Nashik road police registered a complain against Shivaji Chumbhale)

नाशिक (Nashik) बाजार समितीच्या निवडणुकीत (APMC election) आज मतदान होत आहे. त्यात राष्ट्रवादी काँग्रसचे (NCP) माजी खासदार देविदास पिंगळे (Devidas Pingle) यांच्या नेतृत्वाखाली महाविकास आघाडीचे (Mahavikas Aghadi) पॅनल आहे. त्यांच्या विरोधात शिवसेनेचे (Shivsena) शिवाजी चुंभळे आणि भाजपचे (BJP) दिनकर पाटील यांचे पॅनल आहे.

बाजार समितीच्या निवडणुकीच्या प्रक्रियेसाठी आज मतदान होत आहे. प्रचाराच्या तोफा जरी थंडावल्या असल्या तरी मात्र व्यक्तीगत प्रचार सुरू आहे. तो प्रचार आता शिगेला पोहोचला असून निवडणुकीतील शेतकरी विकास पॅनलचे नेते व उमेदवार शिवाजी चुंबळे यांच्या विरोधात नाशिक रोड पोलिस ठाण्यात तक्रार दाखल झाली आहे.

माजी नगरसेवक शिवा भागवत यांना फोन वरून धमकी दिल्याने त्यांनी नाशिकरोड पोलिस ठाण्यात चुंभळे यांच्या विरोधात ही तक्रार दिली आहे. शेतकरी विकास पॅनलचे उमेदवार असलेले शिवाजी चुंबळे आणि त्यांच्या मुलाने काही दिवसांपूर्वी इगतपुरीचे आमदार असलेले हिरामण खोसकर यांना देखील फोनवरून धमकी दिली होती.

आता पुन्हा एकदा नाशिक रोडच्या माजी नगरसेवकास धमकी दिल्याने कृषी उत्पन्न बाजार समितीच्या निवडणुकीच्या मतदानाच्या आदल्या दिवशी वादाची फोडणी पडल्याने कृषी उत्पन्न बाजार समितीची निवडणूक चुरशीची होणार असल्याचं दिसतंय, अर्थात ती चुरस प्रचार व मतदारांच्या संपर्कात नव्हे तर प्रतिस्पर्धी पॅनलच्या नेत्यांनी प्रचारच करायचा नाही, या भूमिकेने आहे. या निवडणुकीत ग्रामपंचायत सदस्य, विविध कार्यकारी सोसायटीचे संचालक मतदार आहेत. गावगाड्याचे राजकारण हाकणारी ही मंडळी अतिशय चणाक्ष असल्याने या दहशतीचे पडसाद निश्चितच मतदानात दिसून येतील, अशी चर्चा अनुभवी मतदारांत आहे.