Seema Hire Setback : भाजप आमदार सीमा हिरेंना मोठा धक्का, दीराचा दारुण पराभव ; दुसरीकडे कट्टर विरोधकाचा विजय

Seema Hire brother-in-law defeat : प्रभाग ७ 'ड' मध्ये शिवसेना शिंदे गटाचे उपनेते अजय बोरस्ते आणि भाजपच्या आमदार सीमा हिरे यांचे दीर माजी नगसेवक योगेश(मुन्ना) हिरे यांच्यातील सामन्याकडे शहराचे लक्ष लागले होते. आज निवडणुकीचा निकाल लागला. शिवसेनेचे उपनेते अजय बोरस्ते यांनी आमदार सीमा हिरे यांचे दीर योगेश हीरे यांचा दारुण पराभव केला आहे.

प्रभागातील उर्वरित भाजपचे तीनही उमेदवार विजयी झाले आहेत. भाजपाचे सुरेश पाटील, हिमगौरी आडके, स्वाती भामरे विजयी झाले. मात्र आमदार सीमा हिरे यांचे दीर योगेश हिरे यांचा शिवसेना शिंदे गटाचे उपनेते अजय बोरस्ते यांनी पराभव केल्याने हा सीमा हिरे यांच्यासाठी देखील मोठा धक्का मानला जात आहे.

या प्रभागात भाजपच्या तीन्ही आमदारांनी हिरे यांना निवडून आणण्यासाठी ताकद पणाला लावली होती. त्यामुळे बोरस्ते विरुद्ध हिरे असा दोघांमधील सामना अधिक लक्षवेधी ठरला. परंतु शिवसेनेचे अजय बोरस्ते हे या सामन्यात बाजीगर ठरले असून नाशिक पश्चिम विधानसभा मतदारसंघाच्या आमदार सीमा हिरे यांचे दीर योगेश मुन्ना हिरे यांच्या वाट्याला पराभव आला.

दुसरीकडे, आमदार सीमा हिरे यांचा विरोध झुगारुन ज्यांच्या भाजप प्रवेश झाला ते सुधाकर बडगुजर मात्र भाजपच्या तिकीटावर प्रभाग २५ मध्ये निवडून आले आहेत. एकीकडे दीराचा पराभव तर दुसरीकडे कट्टर राजकीय विरोधकाचा विजय असा दुहेरी धक्का सीमा हिरे यांना बसल्याचे बोलले जात असून राजकीय वर्तुळात या निकालाची जोरदार चर्चा आहे.

सीमा हिरेंच्या मुलीची माघार....

आमदार सीमा हिरे यांनी आपली मुलगी रश्मी हिरे यांना महापालिका निवडणुकीच्या रिंगणात उतरवण्याची तयारी केली होती. रश्मी हिरे यांचा व दीर योगेश हिरे अशा दोघांचा कुटुंबातून उमेदवारी अर्ज दाखल करण्यात आला होता.

मात्र, आमदार-खासदारांच्या मुलांनी उमेदवारी करु नये असा आदेश भाजप पक्षश्रेष्ठींकडून आल्यानंतर रश्मी हिरे यांचा पत्ता कट झाला. आमदार सीमा हिरे यांना मुलगी रश्मी हिरे यांचा उमेदवारी अर्ज माघारी घ्यावा लागला.