Girish Mahajan: पालकमंत्री कोण? भुजबळांच्या सूचक विधानानंतर महाजन म्हणाले, "झेंडावंदन तर मी केले ना? पुढचा मार्गही..."

 थोडक्यात

1. नाशिकच्या पालकमंत्री पदाच्या वादातून स्वातंत्र्य दिनी ध्वजवंदनाच्या निमित्ताने छगन भुजबळ आणि गिरीश महाजन यांच्यात शाब्दिक चकमक झाली.

2. भुजबळांनी नाशिक सर्वांना आवडते असे म्हणत महाजन यांना मतदारसंघाकडे लक्ष द्यावे असा सूचक टोला लगावला.

3. महाजन यांनी मात्र सावध प्रतिक्रिया देत पालकमंत्री पदाचा निर्णय मुख्यमंत्री आणि उपमुख्यमंत्र्यांवर सोडला, पण झेंडावंदन आपणच केले असा अप्रत्यक्ष दावा केला.

Nashik News: नाशिक आणि रायगड जिल्ह्याच्या पालकमंत्री पदाचा वाद स्वातंत्र्य दिनाच्या निमित्ताने पुन्हा उफाळून आला आहे. नाशिकचे पालकमंत्री कोण याबाबत भाजपचे गिरीश महाजन आणि ज्येष्ठ मंत्री छगन भुजबळ यांनी केलेल्या सूचक वक्तव्याने राजकारण तापलं आहे.

नाशिकच्या पालकमंत्री पदाचा तिढा अद्याप सुटलेला नाही. या पार्श्वभूमीवर स्वातंत्र्य दिनाला शासकीय ध्वजवंदन कोण करणार? हा प्रतिष्ठेचा विषय बनला होता. यामध्ये जलसंपदा मंत्री गिरीश महाजन यांनी बाजी मारली.

मात्र या निमित्ताने जलसंपदा मंत्री गिरीश महाजन आणि राज्याचे अन्न व नागरी पुरवठा मंत्री छगन भुजबळ दोघांच्याही समर्थकांना चर्चेसाठी एक नवा विषय मिळाला. यावेळी छगन भुजबळ यांनी सूचक वक्तव्य करीत नाशिक सर्वांनाच आवडते असे म्हटले. नाशिक जरी आवडत असले तरी आपल्या मतदारसंघाकडेही लक्ष दिले पाहिजे. जळगावकडे देखील दुर्लक्ष होता कामा नये, असा सूचक टोला त्यांनी मंत्री महाजन यांना लगावला.

या संदर्भात जलसंपदा मंत्री महाजन यांनी मात्र अतिशय सावध प्रतिक्रिया व्यक्त केली. नाशिकच्या पालकमंत्री पदाची चर्चा नेहमीच होत असते. त्याबाबत राज्याचे मुख्यमंत्री आणि दोन्ही उपमुख्यमंत्री एकत्र बसून तोडगा काढतील. ते जो काही तोडगा काढतील तो निश्चितच मान्य असेल, असे राजकीय डावपेचाचा भाग असलेले नेहमीचे उत्तर त्यांनी दिले.

मंत्री महाजन यांनी यावेळी आपल्या स्पर्धकांना हिणवण्याची संधी देखील सोडली नाही. पालकमंत्री कोण? यावर फार चर्चा होऊ नये. आपण हळूहळू झेंडावंदनापर्यंत पोहोचलो आहोत. झेंडावंदन तर मी केले ना? पुढचा मार्गही तसाच काढू. मात्र राजकीय अडचणीचे असे प्रश्न सध्या मला विचारू नका, असे सूचक वक्तव्य देखील त्यांनी केले.

मी कधीच पालकमंत्री पदाची मागणी केलेली नाही. एखाद्या मागणीसाठी आंदोलन, धरणे किंवा अडून बसणे असे प्रकार मी कधीही केलेले नाहीत. पक्ष देईल आणि पक्ष सांगेल तसे कामे करीत आलो आहे, असे महाजन म्हणाले.

प्रश्न 1: वादाचा मुख्य मुद्दा काय आहे?
उत्तर: नाशिकच्या पालकमंत्री पदाचा तिढा हा वादाचा मुख्य मुद्दा आहे.

प्रश्न 2: स्वातंत्र्य दिनी ध्वजवंदन कोणी केले?
उत्तर: जलसंपदा मंत्री गिरीश महाजन यांनी ध्वजवंदन केले.

प्रश्न 3: छगन भुजबळांनी महाजन यांना काय सूचक टोला लगावला?
उत्तर: नाशिकसोबत जळगावकडेही लक्ष द्यावे, असे भुजबळांनी म्हटले.

प्रश्न 4: गिरीश महाजन यांनी पालकमंत्री पदाविषयी काय भूमिका मांडली?
उत्तर: त्यांनी सांगितले की मुख्यमंत्री आणि उपमुख्यमंत्र्यांचा निर्णय त्यांना मान्य असेल.