Nashik Kumbh Mela : नाशिक कुंभमेळा बैठकीची जोरदार तयारी, साधु महंतांसाठी खास आमरस -पुरणपोळीचा बेत

Nashik Kumbh Mela: नाशिकमध्ये दर बारा वर्षांनी कुंभमेळा भरतो. प्रयागराज येथील कुंभमेळ्यानंतर आता २०२६-२७ मध्ये नाशिकमध्ये कुंभमेळा होणार आहे. त्या पार्श्वभूमीवर १ जूनला (रविवारी) मुख्यमंत्री देवेंद्र फडणवीस यांच्या अध्यक्षतेखाली महत्वपूर्ण बैठकीचे आयोजन करण्यात आले आहे. तब्बल १३ आखाड्यांचे साधु-महंत या बैठकीत सहभागी होणार आहे. यादरम्यान साधू महंतांसाठी जिल्हा प्रशासनाकडून भोजनाचे नियोजन करण्यात आले असून, त्यासाठी खास आमरस-पुरणपोळी चा बेत ठेवण्यात आला आहे.

जिल्हाधिकारी कार्यालयात या बैठकीचे आयोजन करण्यात आले आहे. यावेळी नाशिकमधील शाहीस्नानाच्या अधिकृत तारखा जाहीर केल्या जाणार आहे. बैठकीमध्ये प्रथमच १३ आखाड्यांचे साधु-महंत एकत्रित येणार आहेत. याशिवाय राज्य सरकारमधील महत्वाचे मंत्री व प्रशासनातील वरिष्ठ अधिकारी देखील या बैठकीला उपस्थित राहणार आहेत. यावेळी आखाड्यांकडून मु्ख्यमंत्र्यांना देखील सहभोजनसाठी आग्रह करण्यात येणार आहे.

नाशिक व त्र्यंबकेश्वर मध्ये कुंभमेळा होणार आहे. त्र्यंबकेश्वरमधील तारखा यापूर्वीच जाहीर झाल्या आहेत. मात्र नाशिकमधील तारखा जाहीर न झाल्याने साधू -महंतामध्ये एकप्रकारे नाराजी होती. या बैठकीत साधू-महंताची नाराजी दूर करुन नाशिकमधील तारखा जाहीर करण्यात येणार आहेत. देशभरातून येणाऱ्या साधु -महंतांच्या स्वागतात काहीही कमतरता भासणार नाही यासाठी प्रशासनाकडून बारकाईने नियोजन केले जात आहे.

खास मुख्यमंत्र्यांच्या हातून हार-शाल व श्रीफळ देऊन साधु-महंतांचे स्वागत करण्यात येणार आहे. सुमारे दोन तास ही बैठक चालणार आहे. या बैठकीत साधु व महंताना त्यांच्या सूचना व मनोगत मांडण्यासाठी पुरेसा कालावधी दिला जाणार आहे. तसेच प्रशासनाकडून कुंभमेळ्याच्या तयारीचे सादरीकरण केले जाणार आहे.

जिल्हाधिकारी कार्यालयातील मध्यवर्ती सभागृहात दुपारी १२ ते २ या वेळेत बैठक होणार आहे. मुख्यमंत्री देवेंद्र फडणवीस यांच्यासह मंत्री छगन भुजबळ, दादा भुसे, माणिकराव कोकाटे, नरहरी झिरवाळ व कुंभमेळा मंत्री गिरीश महाजन हेही या बैठकीला उपस्थित राहणार असल्याचे निश्चित आहे.

या बैठकी दरम्यान मुख्यमंत्री देवेंद्र फडणवीस कुंभमेळा प्राधिकरणाची घोषणा करण्याची शक्यता आहे. मंत्रिमंडळाकडून या प्राधिकरणाला हिरवा कंदील देण्यात आला असला, तरी त्यामध्ये कोणते प्रतिनिधी असतील, आखाडा परिषदेचे पदाधिकारी त्यात सामील असतील का, यासंबंधी स्पष्टता अद्याप नाही. त्यामुळे ही बैठक साधू-संतांसह स्थानिक नागरिकांचेही लक्ष वेधून घेत आहे.