Manikrao Kokate Politics: माणिकराव कोकाटे यांना ती चूक पडली महागात? अटक वॉरंट निघताच मंत्रीपदही धोक्यात?

Nashik court news: क्रीडामंत्री माणिकराव कोकाटे यांचा पाय आणखी खोलात गेला आहे. न्यायालयाने त्यांना दोन वर्षांची शिक्षा कायम ठेवली आहे. त्यामध्ये त्यांनी केलेली एक चूक त्यांना महागात पडली.

नाशिकच्या जिल्हा व सत्र न्यायाधीश पी. एस. बदर यांनी मंगळवारी क्रीडामंत्री माणिकराव कोकाटे यांची शिक्षा कायम ठेवली. कनिष्ठ स्तर न्यायालयाने २० फेब्रुवारीला क्रीडा मंत्री कोकाटे यांना दोन वर्ष कारावासाची शिक्षा सुनावली होती. त्या विरोधात क्रीडामंत्री कोकाटे यांनी अपील केले होते.

क्रीडामंत्री कोकाटे यांना काल न्यायालयाने शिक्षा सुनावली. त्यांचे वकील अॅड अविनाश भिडे उपस्थित होते. मात्र स्वतः मंत्री कोकाटे अनुपस्थित होते. क्रीडा मंत्री कोकाटे अनुपस्थित राहिल्याने ते आता अडचणीत आले आहे. त्यामुळे राष्ट्रवादी काँग्रेस अजित पवार पक्षालाही हा धक्का मानला जातो.

जिल्हास्तर न्यायाधीश पी एस बदर यांनी यासंदर्भात कनिष्ठ स्तर न्यायाधीश नरवाडिया यांना कारवाईचे आदेश दिले. त्यानुसार काही वेळापूर्वी न्यायालयाने कोकाटे यांना अटक करण्याचे वॉरंट जारी केले. सरकार वाडा पोलिसांकडून पुढील कारवाई केली जाणार आहे.

दरम्यान क्रीडामंत्री कोकाटे यांच्या वतीने मुंबई उच्च न्यायालयात या निर्णयाविरोधात अपील दाखल करण्यात आले आहे. या अपिलाची सुनावणी अद्याप झालेली नाही. ती केव्हा होईल हे देखील अनिश्चित आहे. त्यामुळे क्रीडा मंत्री कोकाटे यांना कायदेशीर उपाय योजना कराव्या लागणार आहेत.

क्रीडा मंत्री कोकाटे आज दुपारी न्यायालयात हजर राहून पुढील कार्यवाही पूर्ण करणार होते. न्यायालयात हजर राहून अटक वॉरंट रद्द करणे आवश्यक आहे. त्यानंतर न्यायालयाकडून त्यांना जामीन मंजूर केला जाईल.

दरम्यान कोकाटे न्यायालयात हजर न राहिल्याने ती चूक त्यांना कायदेशीर दृष्ट्या अडचणीत आणणारी ठरली आहे. त्यांना शिक्षा झाली आणि अटक वॉरंट निघाले त्यामुळे त्यांचे मंत्रीपद धोक्यात येऊ शकते. संदर्भात आज मंत्रिमंडळाची बैठक असल्याने कोकाटे हे देखील मुंबईतच होते. ते नाशिकला येऊ शकलेले नाही.

न्यायालयाने अटक वॉरंट काढल्याने तो चर्चेचा विषय ठरला आहे. नाशिक जिल्ह्यात पहिल्यांदाच एखाद्या मंत्र्याविरुद्ध न्यायालयाने अटक वॉरंट काढला आहे. त्यामुळे राजकीय दृष्ट्या तो चर्चेचा विषय ठरला आहे.

----