Girish Mahajan Politics: गिरीश महाजन '100+' वर ठाम, शिंदे शिवसेना पक्षाच्या अफाट अपेक्षा ठरताहेत महायुतीला अडसर?

NMC Election News: महापालिका निवडणुकीत महायुतीत भाजप मोठा भाऊ आहे. निवडणुकीची प्रक्रिया सुरू झाली आहे. त्यामुळे महायुती होणार की नाही याची उत्सुकता आहे.

नाशिक महापालिका निवडणुकीची सर्व सूत्रे जलसंपदा मंत्री गिरीश महाजन यांच्याकडे आहेत. भाजपने नाशिक साठी यापूर्वीच हंड्रेड प्लस घोषणा दिली आहे. त्यामुळे निवडणुकीच्या जागावाटपाची उत्सुकता कायम आहे.

महापालिका निवडणुकीसाठी महायुती व्हावी असा भाजपचा प्रयत्न आहे. संदर्भात मुख्यमंत्री देवेंद्र फडणवीस यांनी संकेत दिले आहेत. जलसंपदा मंत्री गिरीश महाजन यांनीही महायुती व्हावी अशी अपेक्षा व्यक्त केली आहे.

नाशिक महापालिकेच्या १२२ जागांसाठी निवडणूक होत आहे. यामध्ये भाजप गेले वर्षभर राजकीय तयारी करीत आहे. निवडणुकीच्या तयारीत भाजप सर्वात पुढे आहे. महायुतीतील अन्य पक्षांच्या चिंतेत त्यामुळेच भर पडली आहे.

महायुतीचा घटक असलेल्या शिवसेना एकनाथ शिंदे पक्षालाही आपल्या अस्तित्वाची चिंता आहे. त्यामुळे गेल्या वर्षभरात त्यांनी गेल्या वर्षभरात नगर विकास खात्याच्या कारभाराचा फायदा घेतला. या माध्यमातून ३३ हून अधिक माजी नगरसेवकांना पक्षात प्रवेश दिला आहे.

शिवसेना शिंदे पक्षाचे मंत्री दादा भुसे यांनी निवडणुकीत युती होईल अशी अशा व्यक्त केली आहे. युती न झाल्यास स्वबळावर निवडणुकीची तयारी असल्याचा त्यांचा दावा आहे. जागा वाटपाबाबत मात्र शिवसेना शिंदे पक्षाला ६० ते ६५ जागा हव्या आहेत. शिंदे पक्षाची ही अपेक्षा महायुतीतील मोठा अडसर ठरण्याची भीती आहे.

महापालिकेत भाजपचे ६५ विद्यमान नगरसेवक आहेत. याशिवाय उमेदवारीच्या अपेक्षेने शिवसेना उद्धव ठाकरे पक्ष आणि अन्य पक्षातील इच्छुकांनी भाजप पक्षात प्रवेश केला आहे. त्यामुळे हंड्रेड प्लस अशी तयारी केलेल्या भाजपकडे सहकारी पक्षांना देण्यासाठी फारशा जागा नाहीत.

जागा वाटपाबाबत महायुतीची अद्याप कोणतीही चर्चा झालेली नाही. याबाबतचे सर्व निर्णय जलसंपदा मंत्री गिरीश महाजन घेणार आहेत. स्वतः मंत्री महाजन यांनी महायुतीचे संकेत दिले आहे. मात्र शिवसेना शिंदे पक्षाच्या अफाट अपेक्षा भाजपची अडचण ठरण्याची चिन्हे आहेत.