Nashik NMC Election : विवाहाची माहिती लपविल्याचा नगरसेविकेवर आरोप, पद रद्द करण्याची पराभूत कॉंग्रेस उमेदवाराची मागणी

Nashik Politics : नगरसेविका जागृती गांगुर्डे यांनी महापालिका निवडणूक नामनिर्देशन अर्ज दाखल करताना विवाहाची माहिती दडवली आहे. तसेच निवडणूक निर्णय अधिकारी, महापालिका आयुक्त तसेच समाज कल्याण विभाग यांच्यासह मतदारांची दिशाभूल करत फसवणूक केली आहे. त्यांचे नगरसेवक पद रद्द करण्यात यावे. अशी मागणी त्यांचे प्रतिस्पर्धी आणि काँग्रेसचे पराभूत उमेदवार दिगंबर नाडे यांनी पत्रकार परिषदेत केली.

प्रभाग १४ अ मधून अनुसूचित जाती जमाती वर्गातून राष्ट्रवादी काँग्रेस पक्षातर्फे जागृती गांगुर्डे यांनी अर्ज दाखल केला होता. त्यांच्याविरुद्ध काँग्रेसचे उमेदवार दिगंबर नाडे यांनी उमेदवारी केली होती. सुमारे १२०० मताच्या फरकाने जागृती गांगुर्डे यांचा विजय झाला होता. परंतु, उमेदवारी करताना त्यांनी नामनिर्देशन पत्रात त्यांच्या पतीचा उल्लेख, त्यांच्या उत्पन्नाचा तसेच अपत्यांचा उल्लेख केला नाही. विशेष समाजाच्या व्यक्तीबरोबर त्यांचा विवाह झाला असताना ते देखील लपवण्यात आले. असा कुठल्याही विवाह झाला नसल्याचे त्यांच्याकडून सांगण्यात आले. त्यांनी विवाह केल्याचे विवाह नोंदणीपत्र देखील उपलब्ध आहे. त्यावर दोघांचे छायाचित्र आणि सही देखील आहे असे असताना त्यांनी विवाह झाले नसल्याचे सांगितले आहे.

अशाप्रकारे गांगुर्डे यांनी ५१ हजार मतदार, निवडणूक आयुक्त, निवडणूक निर्णय अधिकारी, महापालिका आयुक्त, समाज कल्याण विभागाची दिशाभूल करत फसवणूक केली. त्यामुळे त्यांचे नगरसेवक पद रद्द करावे. दुसऱ्या क्रमांकाच्या सर्वात जास्त मते प्राप्त उमेदवारास विजय घोषित करण्यात यावे. अशी मागणी दिगंबर नाडे यांनी पत्रकार परिषदेत केली आहे.

मनपातील प्रभांग क्रमांक १४ अ मधून अनुसूचित जाती प्रवर्गासाठी आरक्षित जागेवर निवडून आलेल्या राष्ट्रवादी काँग्रेसच्या नगरसेविका जागृती गांगुर्डे मुस्लीम युवकाशी इस्लामी पद्धतीने विवाह केल्याची माहिती निवडणूक अर्जात लपवून समाज, शासन आणि निवडणूक आयोगाची फसवणूक केल्याचा आरोप करत त्यांचे नगरसेवकपद रद्द करण्याची मागणी काँग्रेसचे पराभूत उमेदवार दिगंबर नाडे यांनी पत्रकारपरिषदेत केली.

याबाबत दिगंबर नाडे यांनी न्यायालयात दाद मागितली आहे. त्यांनी नाशिक जिल्हा न्यायालयात याचिका दाखल केली आहे. १२ फेब्रुवारी रोजी निवडणूक याचिका दाखल करण्यात आली आहे. लवकरच याबाबत सुनावणी होणार असल्याचेही नाडे यांच्या वकिलांनी सांगितले.