Nashik NMC Election News: नाशिक महापालिका निवडणुकीचा प्रचार संपला. या निवडणुकीत शहरातील एक प्रभाग विशेष चर्चेत आहे. विद्यमान आमदार आणि माजी आमदार यांनी तो प्रभाग आणि तेथील उमेदवार प्रतिष्ठेचे केले होते.
महापालिका निवडणुकीत विधानसभा निवडणुकीची प्रचिती यावी एवढ्या संघर्ष प्रभाग २२ मध्ये दिसला. राष्ट्रवादी काँग्रेस अजित पवार पक्षाच्या आमदार सरोज अहिरे यांनी गेले पंधरा दिवस प्रचारात घेतलेले परिश्रम त्यासाठी कारणीभूत ठरले. उमेदवारांपेक्षाही अधिक प्रचार आमदारांनीच केला.
महापालिकेची निवडणूक असली तरी विधानसभा निवडणुकीची झलक त्यात दिसली. कारण शिवसेना उद्धव ठाकरे पक्षाचे माजी आमदार योगेश घोलप आणि अजित पवार पक्षाच्या आमदार अहिरे हे दोघे परस्परांविरुद्ध संघर्ष करताना दिसले.
प्रभाग क्रमांक २२ मध्ये विक्रम कोठुळे, संध्या पवार, मोनाली कोरडे, गणेश खर्जुल हे अजित पवार पक्षाचे उमेदवार आहेत. यांच्या विरोधात शिवसेना ठाकरे पक्षाचे योगेश गाडेकर, विभाग प्रमुख केशव पोरजे, वैशाली दाणी, संजीवनी हांडोरे तर शिवसेना एकनाथ शिंदे पक्षाकडून माजी महापौर नयना घोलप असे प्रमुख उमेदवार आहेत.
विशेष म्हणजे माजी आमदार योगेश घोलप उद्धव ठाकरे पक्षासाठी आपल्या भगिनी माजी महापौर घोलप यांच्या विरोधात प्रचार करीत आहे. देवळाली गाव आणि विहित गाव हा परिसर माजी मंत्री घोलप यांचा बालेकिल्ला होता. आमदार अहिरे यांनी तो काबीज केला.
ग्रामीण टच आणि गावाशी संबंधित उमेदवार, या उमेदवारांतील पारंपरिक संघर्ष हे त्याचे कारण ठरले. माजी मंत्री बबनराव घोलप यांच्या या बालेकिल्ल्यात आमदार अहिरे यांनी विधानसभा निवडणुकीत मुसंडी मारली होती. विधानसभा निवडणुकीत अहिरे विरुद्ध घोलप हा संघर्ष पेटला होता. त्याची झलक पुन्हा एकदा महापालिका निवडणुकीच्या प्रचारात दिसली.
महापालिका निवडणुकीच्या या प्रचारात उमेदवारांपेक्षा आमदार अहिरे याच जास्त सक्रिय होत्या. त्यांनी आपले सर्व लक्ष या प्रभागावर केंद्रित केले होते. मिळाली विधानसभा मतदारसंघाचा भाग असल्याने त्यांचे राजकीय अस्तित्व पणाला लागल्यासारखी स्थिती दिसली.
नुकत्याच झालेल्या विधानसभा निवडणुकीत आमदार अहिरे या दुसऱ्यांदा निवडून आल्या. त्यांना माजी आमदार योगेश घोलप यांनी आव्हान दिले होते. घोलप आणि देवळालीगाव आणि विहितगाव हे एक पारंपरिक राजकीय समीकरण मांडले जाते. या समीकरणाला छेद देण्यासाठी आमदार अहिरे पदर कमरेला खोचून घरोघर फिरल्या.
आजी, माजी आमदारांना मतदारांचा किती प्रतिसाद मिळतो हे लवकरच स्पष्ट होईल. मात्र भगूर नगरपालिका निवडणुकीच्या यशामुळे आत्मविश्वास वाढलेल्या आमदार अहिरे या निवडणुकीत त्यांच्या समर्थकांमध्ये चर्चेचा विषय बनल्या आहेत, हे मात्र नक्की.
-------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.