NCP Ajit Pawar: निवडणुकीच्या धामधुमीत, राष्ट्रवादी काँग्रेसच्या पुढाकाराने निराधारांना मिळणार ५ किलो हक्काचे धान्य अन् दिलासा!

Nashik NCP News: निवडणुकीच्या धामधुमीत सर्वच पक्ष आणि नेते प्रचारात व्यस्त आहेत. जनसामान्यांच्या कामाला आचारसंहितेचा अडथळा आहे. अशातच राष्ट्रवादी काँग्रेस अजित पवार पक्षाच्या नेत्यांनी एक प्रश्न हाती घेतला.

राष्ट्रवादी काँग्रेस अजित पवार पक्षाच्या पुढाकाराने शासनाची कोणतीही मदत नसलेल्या वृद्धाश्रमांच्या प्रश्नांची दखल घेण्यात आली आहे. यासंदर्भात स्थानिक नेत्यांनी निवडणुकीच्या प्रचारातून वेळ काढून जिल्हाधिकाऱ्यांची भेट घेतली. निराधार यांना शासनाकडून मदत मिळावी अशी मागणी यावेळी करण्यात आली.

शासनाच्या योजनेतून अनेक वृद्धाश्रम सुरू असतात. या वृद्धाश्रमांना शासनाची विविध प्रकारे मदत देखील मिळते. मात्र शासनाची कोणतीही मदत न घेता देखील नाशिक जिल्ह्यात आणि ग्रामीण भागात वृद्धाश्रम सुरू आहेत.

शासनाची कोणतीही मदत न घेता आणि विशेषता शेतकऱ्यांकडून काही वृद्धाश्रम चालविले जात आहेत. त्यात निराधार आणि वृद्ध राहतात. त्यांना मिळणारे सहाय्य अतिशय तुटपुंजे असते. याकडे राष्ट्रवादी काँग्रेसने लक्ष वेधले आहे.

याबाबत अजित पवार पक्षाचे नेते अर्जुन टिळे, डॉ जाकिर शेख, अनिल चौगुले, महेश थोरात, निवृत्ती आर इंगळे, हेमंत दिघोळे, राजेश बेन्स या पदाधिकाऱ्यांनी जिल्हाधिकाऱ्यांची भेट घेतली. या प्रश्नावर चर्चा केली. त्यामुळे जिल्हाधिकाऱ्यांनी त्याची तातडीने दखल घेतली आहे.

जिल्हा पुरवठा अधिकाऱ्यांतर्फे जिल्ह्यातील वृद्धाश्रम आणि निराधार आश्रमांची माहिती संकलित करण्यात येणार आहे. या आश्रमांमध्ये राहणाऱ्या वृद्धांना तातडीने दरडोई पाच किलो धान्य देण्याचा आदेश जिल्हाधिकाऱ्यांनी दिला. संदर्भात या आश्रमांचे कायमस्वरूपी रेशन कार्ड तयार करण्याच्या सूचनाही देण्यात आल्या.

सध्या सर्वच राजकीय पक्ष आणि नेते महापालिका निवडणुकीच्या प्रचारात व्यस्त आहेत. शासनाची यंत्रणाही निवडणुकीच्या कामाला लागली आहे. अनेक प्रश्नांना आचारसंहितेचा फटका बसला आहे. अशात निवडणुकीतून बाहेर पडून निराधार आणि वृद्धाश्रमात राहणाऱ्या नागरिकांसाठी राष्ट्रवादी काँग्रेसच्या नेत्यांनी पुढाकार घेतल्याने तो चर्चेचा विषय आहे.

------