Devendra Fadnavis Politics: देवा भाऊ आज महायुतीच्या सहकाऱ्यांचा काय घेणार समाचार? भाजपची निर्णयाक सभा!

Nashik BJP News: नाशिक महापालिकेच्या निवडणुकीत भाजप स्वबळावर मैदानात उतरला आहे. महायुतीच्या सहकारी पक्षांनाही भाजपने दूर केले. पार्श्वभूमीवर गेले काही दिवस राष्ट्रवादी काँग्रेस आणि शिवसेना भाजपवर टीकेची झोड उठवत आहे.

मुख्यमंत्री देवेंद्र फडणवीस यांच्या उपस्थितीत आज नाशिकमध्ये प्रचार सभा होत आहे. भाजपने नाशिक महापालिकेसाठी हंड्रेड प्लस अशी घोषणा केली आहे. या पार्श्वभूमीवर ही सभा निर्णायक मानली जाते.

भाजपच्या 100 प्लस घोषणेची महायुतीच्या घटक पक्षांनीही खिल्ली उडवली आहे. विरोधकांकडून या संदर्भात बोचरी टीका होत आहे. या पार्श्वभूमीवर भाजपवर स्तहू बाजूने होणाऱ्या टीकेला आज काय उत्तर दिले जाते याची उत्सुकता आहे.

महापालिका निवडणुकीसाठी जलसंपदा मंत्री गिरीश महाजन त्यांच्याकडे सर्व सूत्रे आहेत. गेले तीन दिवस नाशिक मध्ये तळ ठोकून आहेत. त्यांनी विविध स्टार प्रचारकांना ग्राउंडवर उतरवले आहे.

मंत्री महाजन गेले तीन दिवस शहरातील सर्व उमेदवारांच्या संपर्कात आहेत. पडद्यामागे राहून त्यांनी निवडणुकीचे सूत्रे हलवत उमेदवारांना विविध सूचना आणि टिप्स दिल्या आहेत. उमेदवारांचे मनोबल उंचविण्यासाठी भाजपकडून भरपूर रसद पुरविण्यात येत आहे.

या पार्श्वभूमीवर राज्यातील सत्तेत सहभागी असलेल्या शिवसेना एकनाथ शिंदे पक्ष आणि राष्ट्रवादी काँग्रेस अजित पवार पक्ष निवडणुकीत एकत्र आला आहे. शनिवारी झालेल्या सभेत या सहकाऱ्यांनीच भाजपच्या हंड्रेड प्लस घोषणाची खिल्ली उडवली होती. पैसे वाटपाचे आरोप देखील केले होते.

गेल्या निवडणुकीत मुख्यमंत्री देवेंद्र फडणवीस यांनी नाशिक शहर दत्तक घेण्याची घोषणा केली होती. या पार्श्वभूमीवर विरोधकांकडून नाशिक शहर बकाल झाल्याची आणि दत्तक घोषणेची खिल्ली उडवली होती. या सर्व टीकेचा मुख्यमंत्री देवेंद्र फडणवीस आज कसा समाचार घेतात याची उत्सुकता आहे.

महापालिका निवडणूक शेवटच्या टप्प्यात आली असून प्रचारात सर्वच पक्षांनी सर्व शक्ती पणाला लावली आहे. विशेषतः शिवसेना एकनाथ शिंदे पक्षाने भाजपला मोठे आव्हान उभे केले आहे. या परिस्थितीत भाजपची आजची सभा निर्णायक मानली जाते.

------