Shivsena UBT MNS News: महापालिका निवडणुकीच्या तोंडावर शिवसेना उद्धव ठाकरे आणि राज ठाकरे देणार भाजपला आव्हान देणार आहे. त्यासाठी येत्या शुक्रवारी (ता.१२) शहरातील भ्रष्टाचार, गुन्हेगारी आणि बिघडलेली कायदा-सुव्यवस्थेच्या प्रश्नावर जनतेचे लक्ष वेधणार आहे. याबाबत दोन्ही पक्षांनी जोरदार तयारी केली आहे.
यासंदर्भात आज मनसेचे प्रदेश सरचिटणीस दिनकर पाटील, सलीम शेख, शिवसेना उद्धव ठाकरे पक्षाचे उपनेते दत्ता गायकवाड, माजी आमदार वसंत गिते यांसह पक्षाच्या पदाधिकाऱ्यांनी सत्ताधारी पक्षाला आव्हान दिले. नाशिक शहरात गेल्या सहा महिन्यात ३५ खून झाले आहेत. आता तर नगरसेवकच कोयता घेऊन खून करून लागल्याने नागरिकांनी दाद मागावी कोणाकडे, असा प्रश्न त्यांनी केला.
नाशिक महापालिका, स्मार्ट सिटीतील भ्रष्टाचार, रस्त्यांवरील खड्डे, ड्रग्ज, कोयता गँगची दहशत आणि शहरातील हाताबाहेर गेलेली स्थिती हे गंभीर प्रश्न आहेत. त्यावर प्रशासनाला वठणीवर आणण्याचे काम केवळ शिवसेना आणि मनसे हे पक्षच करू शकतात. त्यामुळे सत्ताधारी भाजपने या प्रश्नांवर काय केले, हे जाहीर करावे.
जिल्ह्यातील गंभीर प्रश्नांकडे सत्ताधारी लोकप्रतिनिधी आणि चारही मंत्री निष्क्रीय ठरले आहेत. अन्याय, भ्रष्टाचार आणि जनतेच्या जीवनाशी खेळणाऱ्या महायुती सरकारच्या बेफिकीरीविरोधात शिवसेना-मनसेच्या वतीने “संयुक्त जनआक्रोश मोर्चा” काढला जाईल. सत्ताधारी पक्ष केवळ निवडणुकीची तयारी करण्यात मश्गुल आहे. जनतेशी त्यांना काहीही देणे घेणे नाही, असा आरोप यावेळी करण्यात आला.
शहरात हनीट्रॅप प्रकरण घडले. त्याची राज्यभर चर्चा झाली. याबाबत राज्य शासनाने त्यावर पांघरूण घालण्याचे काम केले. त्यात विद्यमान तसेच माजी मंत्र्यांचे नाव घेतले गेले. मात्र त्यावर कारवाई न केल्याने शासनाने जनतेची फसवणूक केली. सामान्य नाशिककरांना याबाबत कारवाई का होत नाही, याची उत्सुकता आहे.
शहरात कोयता गॅंग, अमली पदार्थ, ऑनलाइन जुगार, शहरात व जिल्ह्यात अनेक दिवसांपासून सुरू असलेली एमडी ड्रग्सची विक्री, युवकांना अमली पदार्थाने घातलेला विळखा, अवैद्य धंदे यांची दहशत यामुळे गुन्हेगारी चे प्रमाण वाढले आहे. ऑनलाईन जुगार मुळे तरुणाई उध्वस्त झाली आहे. पोलीस आणि सत्ताधारी याचा या सर्वांना मुक्का पाठिंबा आहे, असा आरोप दिनकर पाटील यांनी केला.
राज्य सरकारने शेतकऱ्यांशी वचनभंग केला. कर्जमाफी, हमीभाव, वीजपुरवठा या आश्वासनांची पूर्तता न केल्याने फसवणूक झाली आहे. दुसरीकडे महापालिकेसह स्मार्ट सिटी, पाणीपुरवठा, रस्ते कामांत कोट्यवधींचे घोटाळे झाले आहेत. सर्व रस्त्यांवर खड्डे आहेत.
मोर्चाच्या तयारीसाठी गेल्या वीस दिवसांत शहराच्या सर्व प्रभागांत आणि जिल्ह्यात प्रत्येक तालुक्यात आढावा बैठक झाली. आगामी महापालिका, जिल्हा परिषद निवडणुकीच्या पार्श्वभूमीवर नेत्यांनी शक्ती प्रदर्शनावर भर दिला आहे. रतनकुमार इचम, जयंत दिंडे, डी. जी. सूर्यवंशी, मनसे जिल्हा अध्यक्ष अंकुश पवार, सुदाम कोंबडे, प्रथमेश गीते, मनसे महिला प्रदेश उपाध्यक्ष सुजाता डेरे आदी नेते यावेळी उपस्थित होते.
------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.