Shiv Sena UBT Politics : उद्धव ठाकरेंच्या माजी आमदाराने, भाजपात गेलेल्या विनायक पांडेंचा पंचनामाच केला!

Vasant Geete News: महापालिका निवडणुकीच्या धामधुमीत अनेकांनी पक्षांतर केले. शिवसेना उद्धव ठाकरे पक्षाचे माजी महापौर विनायक पांडे यांचे पक्षांतर चर्चेचा विषय ठरला आहे. त्यामुळे पांडे यांच्यावर आरोप होत आहेत. शिवसेना उद्धव ठाकरे पक्षाच्या उमेदवारांचा प्रचार जोरात आहे. शिवसेना उद्धव ठाकरे पक्षाचे विविध नेते सध्या प्रचारात सहभागी होत आहेत. माजी आमदार वसंत गीते यांनी शहरातील प्रचाराची धुरा सांभाळली आहे.

माजी आमदार गीते यांचे निकटवर्तीय म्हणून माजी महापौर विनायक पांडे यांचे नाव चर्चेत होते. उमेदवारीच्या वादातून पांडे यांनी शिवसेनेला जय महाराष्ट्र करीत भाजपला जवळ केले. त्यांचे हे पक्षांतर त्यांच्या समर्थकांमध्ये आणि विरोधकांमध्ये वादाचा विषय आहे. या पार्श्वभूमीवर विनायक पांडे यांच्या बालेकिल्ल्यात माजी आमदार गीते यांची सभा झाली.

शिवसेना उद्धव ठाकरे पक्षाच्या निष्ठावंत उमेदवारांना मतदान करण्याचे आवाहन त्यांनी केले. नाशिक मधील जनता सुज्ञ असून ते गद्दार उमेदवारांना थारा देणार नाहीत, असे गीते म्हणाले. माजी महापौर विनायक पांडे यांचा उल्लेख माजी आमदार गीते यांनी "कपाळ करंटे"असा केला. पांडे हे प्रत्येकाकडून पैसे वसुली करत होते.

पक्षाने त्यांना महापौर केले. नगरसेवक केले. मात्र त्याची जाणीव त्यांनी ठेवली नाही. विधानसभा निवडणुकीत पांडे यांनी पक्षाच्या विरोधात काम केले. त्यांना अनेक अडचणीत कुटुंब म्हणून मी मदत केली. मात्र विधानसभा निवडणुकीत माझ्या विरोधात पांडे यांनी काम केल्याचा आरोप, गीते यांनी केला.

माजी आमदार गीते यांनी पांडे यांना टार्गेट केले. त्यामुळे नाशिक महापालिकेच्या निवडणूक प्रचार आरोप प्रत्यारोपांना सुरुवात होण्याची चिन्हे आहेत. विशेषतः शिवसेना उद्धव ठाकरे पक्ष आक्रमक झाल्याने पांडे त्याला काय उत्तर देतात, याची उत्सुकता आहे.