Nashik Politics : नाशिकमध्ये माजी अध्यक्षांसह सभापतींना धक्का, नव्या आरक्षणामुळे संधी हुकली

Nashik Politics : नाशिक तालुक्यातील ४ गट आणि ८ गणांच्या आरक्षणात खुल्या प्रवर्गातील उमदेवारांचा हिरमोड झाला आहे. कारण ४ पैकी ४ गट राखीव झाले आहेत. त्यात पळसे नागरिकांच्या मागास प्रवर्गासाठी, गिरणारे आणि गोवर्धन हे २ गट आदिवासींसाठी तर एकलहरे हा अनुसूचित जाती महिलेसाठी राखीव झाला आहे. गोवर्धन गट हा सलग दुसऱ्यांदा आदिवासींसाठी राखीव झाल्याने येथे महिलांना संधी मिळेल.

पंचायत समिती गणांचा विचार केला तर सय्यदपिंप्री अन् लहवित हे दोन्ही खुले झाले आहेत. पळसे आणि विल्होळी गण नामप्र (महिला) साठी राखीव झाले असून, एकलहरे गण अनुसूचित जातीच्या महिलेसाठी राखीव झाला आहे. विशेष म्हणजे गिरणारे, देवरगाव हे दोन्ही गण अनुसूचित जमाती महिलेसाठी तर गोवर्धन गण हा अनुसूचित जमातीसाठी खुला झाला आहे.

गोवर्धन गट - गतवेळी आदिवासी राखीव होता. यंदाही आदिवासींसाठी (महिला) राखीव झाला आहे. येथून आमदार हिरामण खोसकर निवडून आले होते. त्यानंतर ते विधानसभेत पोहोचले. गिरणारे गट गतवेळी आदिवासी महिलेसाठी राखीव होता. येथून राष्ट्रवादीचे आमदार हिरामण खोसकर यांच्या सुनबाई अपर्णा खोसकर या निवडून येऊन पुढे जिल्हा परिषद महिला बालकल्याण सभापतीही झाल्या होत्या.

या वेळीही हा गट आदिवासी खुला झाला आहे. यात गिरणारे अन् देवरगाव हे दोन गणांचा समावेश असून, गिरणारे गण हा गतवेळप्रमाणेच आदिवासी महिलेसाठी राखीव झाला. तर देवरगाव गणही आदिवासी महिलेसाठीच राखीव आहे.

पळसे गट : हा यावेळी नागरिकांचा मागास प्रवर्गासाठी राखीव झाला असून तेवढाच काय तो दिलासा इतर प्रवर्गाला मिळाला. आता येथेच इच्छुकांची झुंबड उडणार असून इतर गटांमधील उमेदवारही येथूनच भिडण्याची शक्यता आहे. एकलहरे या गटातील इच्छुकांचा हिरमोड झाला. गेल्यावेळी हा गट सर्वसाधारण अर्थात खुला होता. एकहलरे गण हा अनुसूचित जाती महिलेसाठी राखीव झाला आहे. गतवेळी तो सर्वसाधारण प्रवर्गासाठी होता. लहवीत गट खुला (सर्वसाधारण) झाला आहे. गतवेळी तो अनुसूचित जातीसाठी राखीव होता.