Shani Shingnapur Nitin Shete Death : 'शनैश्वर'च्या नितीन शेटे मृत्यूमागे वेगळच कारण? पोलिस अधीक्षक म्हणाले, 'बनावट अ‍ॅप प्रकरणात...'

Ahilyanagar SP Somnath Gharge statement : भ्रष्टाचाराच्या फेऱ्यात अडकलेल्या शनिशिंगणापूरच्या श्री शनैश्वर देवस्थान ट्रस्टचे माजी विश्वस्त तथा उप कार्यकारी अधिकारी नितीन शेटे यांनी गळफास घेऊन मृत्यूप्रकरणाने खळबळ उडाली आहे.

नितीन शेटे यांच्या मृत्यूचं नेमकं कारण समोर न आल्याने, अन् सध्या देवस्थानच्या भ्रष्टाचाराचा, बनावट अ‍ॅप प्रकरणाचा, नोकर भरती प्रकरणाचा मुद्दा गाजत नसल्याने वेगवेगळ्या चर्चांना पेव फुटलं आहे. यावर अहिल्यानगर जिल्ह्याचे पोलिस अधीक्षक सोमनाथ घार्गे यांनी मोठा खुलासा केला.

शनिशिंगणापूर (Shanishingnapur) इथल्या श्री शनैश्वर देवस्थान ट्रस्टचे माजी विश्वस्त आणि सध्या उपमुख्य कार्यकारी अधिकारी म्हणून कार्यरत असलेले नितीन शेटे यांनी आपल्या राहत्या घरी गळफास घेतल्याने मृत्यू झाला. आज सोमवारी सकाळी 8 वाजता हा प्रकार उघडकीस आला. यानंतर एकच खळबळ उडाली.

दरम्यान, नितीन शेटे यांच्या मृत्यूप्रकरणी शनिशिंगणापूर पोलिस (Police) ठाण्यात अकस्मात मृत्यूची नोंद करण्यात आली आहे. नितीन शेटे हे 2021 पासून शनैश्वर देवस्थान ट्रस्टमध्ये उप कार्यकारी अधिकारी म्हणून कार्यरत होते. सध्या देवस्थान भ्रष्टाचाराच्या प्रकरणांनी गाजत आहे. यातच देवस्थानच्या नावाने चालवले जाणाऱ्या बनावट ऑनलाईन अ‍ॅपचा मुद्दा तपाला असून, सायबर पोलिसांच्या फिर्यादीवरून शनिशिंगापूर पोलिस ठाण्यात गु्न्हा देखील आहे.

या गुन्ह्याचा तपास सायबर पोलिस करत आहेत. या प्रकरणात अनेक पदाधिकाऱ्यांचे आणि पुजाऱ्यांचे जबाब सायबर पोलिसांनी नोंदवले आहेत. मात्र, नितीन शेटे यांना या चौकशीसाठी कधीही पोलिसांनी बोलावले नव्हते किंवा त्यांना समन्सही बजावण्यात आले नव्हते, अशी माहिती जिल्हा पोलिस अधीक्षक सोमनाथ घार्गे यांनी दिली आहे.

नितीन शेटे यांच्यावर चौकशीचा सासेमिरा नव्हता, तर त्यांनी आत्महत्या कोणत्या कारणाने केली, याबाबत सायबर पोलिस तपास करत आहे. खरंतर शेटे यांनी आत्महत्या केलेल्या ठिकाणाहून पोलिसांना कोणतीही सुसाईड नोट मिळालेली नाही. त्यामुळे त्यांनी टोकाचं पाऊल नेमकं कोणत्या कारणामुळे उचललं, हे अद्याप स्पष्ट झालेलं नाही. पोलिस याप्रकरणाचा सखोल तपास करत आहे, असे पोलिस अधीक्षक सोमनाथ घार्गे यांनी सांगितले.