BJP Sujay Vikhe On Ajit Pawar : सुजयदादा अजितदादांसाठी मैदानात, 'टार्गेट' करणाऱ्यांना सुनावलं; म्हणाले, 'ठाकरे अन् पवारांच्या नेत्यांना लग्नपत्रिकाच नसते

Rajendra Hagavane case : पुणे पिंपरीमधील राजेंद्र हगवणे कुटुंबाने केलेल्या छळामुळे सून वैष्णवी हिनं आत्महत्या केली. हगवणे कुटुंब म्हणजे, सुनेसाठी छळछावणीच होती. राष्ट्रवादी काँग्रेस पक्षाशी संबंध असल्याने या कुटुंबावर कारवाई होत नसल्याचा आरोप होत होता.

वैष्णवीच्या आत्महत्येनंतर मात्र, हे हगवणे कुटुंबाच्या छळछावणीचा इतिहास समोर आला आणि प्रकरण चांगलच पेटलं. यात राष्ट्रवादी काँग्रेस पक्षाचे अध्यक्ष उपमुख्यमंत्री अजित पवार देखील टार्गेट झाले. यावर अजितदादांनी खुलासा केला असला, तरी टार्गेट होत आहेत. अजितदादांसाठी भाजपचे सुजयदादा विखे मैदानात उतरले आहेत.

सुजय विखे यांनी अजितदादांना लग्नाला गेले म्हणून टार्गेट करणे चुकीचे आहे. शिवसेना (Shivsena) उद्धव बाळासाहेब ठाकरे सेना पक्ष आणि राष्ट्रवादी काँग्रेस पार्टी शरदचंद्र पवार पक्षाच्या लोकांना लग्नाच्या पत्रिकाच येत नाहीत. ज्या लोकांना पत्रिका येत नाही, त्या लोकांना कोणी दुसरा लग्नात गेला, तर त्याचा त्रास होऊ शकतो. त्यामुळे शिवसेना ठाकरे आणि राष्ट्रवादी पवार पक्षाच्या प्रवक्त्यांना देखील लग्नाच्या पत्रिका द्यायला सुरुवात करा, असा टोला लगावला.

'आम्ही देखील लग्नाला जात असतो. कार्यकर्ते, पदाधिकाऱ्यांचा तसा आग्रह असतो. त्यातील अनेकांच्या संसाराबाबत वेगवेगळ्या गोष्टी घडतात, असे सांगताना मी गेलेल्या एका लग्नात, तर नवरीच लग्न लागण्याच्या अगोदरच पळून गेली होती, मग काय करणार?', असा प्रश्न सुजयदादांनी (Sujay Vikhe) अजितदादा टार्गेट करणाऱ्यांना केला.

राजेंद्र हगवणे याला यापूर्वी कोणीही ओळखत नव्हतं, मात्र आज मीडियामुळे संपूर्ण महाराष्ट्र त्याला ओळखू लागला आहे. त्याने केलेल्या कृत्याची शिक्षा त्याला मिळालीच पाहिजे. त्यामुळे राजकीय व्यक्तींना, अशा प्रकरणात ओढू नये, असे देखील सुजय विखे यांनी म्हटले.

आमच्याबरोबर देखील अनेक जण फोटो काढतात. त्यानंतर काही जण म्हणतात वाळू तस्कर आहे. हा आरोपी होता. हे टाळायचं असेल तर कायदाच करावा लागेल. प्रत्येक आरोपीच्या कपड्यावर बिल्ला लावण्याची वेळ येईल, अशी टिप्पणी देखील सुजय विखे यांनी केली.