Nashik Crime : भाजप नेत्याच्या अडचणी वाढल्या, मारहाण केलेल्या युवकाचा मृत्यू; नातेवाईकांचा रुग्णालय, आयुक्तालयात ठिय्या!

Nashik Crime News : गेल्या आठवड्यात अपघाताच्या किरकोळ कारणावरून माजी नगरसेवक,भाजप नेते उद्धव निमसे यांच्या गटाकडून राहुल धोत्रे या युवकाला मारहाण केली होती. या मारहाणीत धोत्रे याचा शुक्रवारी उपचारा दरम्यान रुग्णालयात मृत्यू झाला. त्यामुळे प्रकरण चांगलेच तापले आहे. या प्रकरणी उद्धव निमसे चांगलेच अडचणीत आले असून न्यायालयाने हत्या प्रकरणात जामीन नाकारला.

राहुल धोत्रे याचा शुक्रवारी रुग्णालयात उपचार सुरू असताना मृत्यू झाला. त्यानंतर वंचित बहुजन आघाडी तसेच शिवसेना उद्धव ठाकरे पक्षाच्या पदाधिकाऱ्यांनी संताप व्यक्त करून कारवाईची मागणी केली. धोत्रेच्या नातेवाईकांनी रुग्णालयात जमून मृतदेह ताब्यात घेण्यास नकार दिला. त्यानंतर पोलीस आयुक्त कार्यालयात जाऊन भाजप नेते उद्धव निमसे यांना तात्काळ अटक करण्याची मागणी केली.

दरम्यान सत्र न्यायालयाने भाजप नेते उद्धव निमसे यांना दिलेला अटकपूर्व जामीन रद्द केला. पोलिसांनी या प्रकरणात खुनाचा गुन्हा दाखल केला. त्यामुळे भाजप नेते निमसे यांच्या अडचणी वाढल्या. परिस्थिती तणावपूर्ण बनल्याने पोलिसांनी निमसे यांच्या घराला मोठा पोलीस बंदोबस्त ठेवला होता. दरम्यान, निमसे यांच्या काही साक्षीदारांना पोलिसांनी अटक देखील केली आहे. मात्र, निमसे हे स्वत: फरार आहेत.

या संदर्भात वंचित बहुजन आघाडीचे नेते ॲड संदीप जाधव यांनी पोलिस आयुक्तांना या प्रकरणात गंभीर त्रुटी असल्याचे निदर्शनास आणून दिले. या प्रकरणातील खरे आरोपी मोकट आहेत. भलत्याच आरोपींना अटक करण्यात आली आहे. या प्रकरणाचे मुख्य सूत्रधार भाजप नेते उद्धव यांचे आहेत. त्यांना तात्काळ अटक करावी. अन्यथा तीव्र आंदोलन केली जाईल असा इशारा यावेळी देण्यात आला.

दरम्यान, याबाबत पोलिस जाणीवपूर्वक आरोपींना सहकार्य होईल अशी भूमिका घेत असल्याचा आरोप मृताच्या नातेवाईकांनी केला आहे. धोत्रे कुटुंबीयांना जीवे ठार मारण्याची धमकी देण्यात आली आहे. हे कुटुंब अद्याप घरी गेलेले नाही. मात्र या प्रकरणातील मुख्य सूत्रधार भाजप नेते उद्धव निमसे अद्यापही फरार आहेत.

भाजप अडचणीत?

राहुल धोत्रे याचा मृत्यू झाल्याने या प्रकरणाला गंभीर वळण मिळाले. आगामी महापालिका निवडणुकीच्या पार्श्वभूमीवर भारतीय जनता पक्षाच्या नेत्यांची मोठी अडचण होऊ शकते. शिवसेना उद्धव बाळासाहेब ठाकरे पक्ष आणि वंचित बहुजन आघाडीने या प्रकरणात उडी घेतली आहे. त्याचे नातेवाईक आणि परिचित चांगलेच संतप्त झाले असून त्यांनी मृतदेह ताब्यात न घेण्याची भूमिका घेतली आहे. त्यामुळे पोलिसांवरही मोठा दबाव निर्माण झाला आहे.