Rahul Solapurkar News: मुस्लिम समाजही झाला आक्रमक, सोलापूरकरांच्या प्रतिमेला मारले जोडे!

Rahul Solapurkar News: वादग्रस्त अभिनेते राहुल सोलापूरकर यांनी छत्रपती शिवाजी महाराज यांच्या विषयी वादग्रस्त विधान केले होते. त्यामुळे त्यांच्या विरोधात वातावरण चांगलेच पेटले आहे. नाशिकमध्ये याबाबत विविध पक्ष आणि संघटनांनी आंदोलन करून कारवाईची मागणी केली आहे.

अभिनेते राहुल सोलापूरकर यांनी जाणीवपूर्वक बहुजन समाज आणि महाराष्ट्राच्या भावना दुखावण्यासाठी असे विधान केले आहे. एका मुलाखतीत त्यांनी हे वादग्रस्त आणि निषेधार्य विधान केले. हे करताना त्यांची देहबोली विचारात घेतल्यास ते सर्व जाणीवपूर्वक करीत असल्याचे स्पष्ट होते, असा आरोप आंदोलकांनी केला आहे.

यासंदर्भात छत्रपती शिवाजी मुस्लिम ब्रिगेड अतिशय आक्रमक झाली आहे. या संघटनेच्या मुस्लिम समाजाच्या पदाधिकारी आणि कार्यकर्त्यांनी काल आंदोलन केले. यावेळी त्यांनी भद्रकाली परिसरात राहुल सोलापूरकर यांच्या फोटोला जोडे मारण्यात आले. नाशिक शहरात देखील आंदोलन झाले.

यावेळी मोठ्या प्रमाणावर घोषणा देण्यात आल्या. पोलीस ठाण्यात जाऊन निवेदन देण्यात आले. पोलिसांनी तातडीने सोलापूरकर यांना अटक करावी. त्यांच्याविरुद्ध गुन्हा दाखल करावा, अशी कारवाई न केल्यास तीव्र आंदोलन छेडण्यात येईल असा इशाराही यावेळी देण्यात आला.

अभिनेते सोलापूरकर हे महापुरुषांविषयी अभद्र भाषा वापरतात यामागे त्यांचे मोठे कारस्थान आहे. वारंवार अशी विधाने केल्यानंतर ते छत्रपती शिवाजी महाराज आणि अन्य राष्ट्रपुरुषांचे महत्त्व कमी करण्याचा प्रयत्न करीत आहेत. त्यामुळे त्यांचे हे विधान गांभीर्याने घेतले पाहिजे, असे ब्रिगेडचे प्रदेशाध्यक्ष अजित पठाण यांनी सांगितले.

यावेळी ब्रिगेडचे पदाधिकारी मुक्तार शेख, बबलू शेख, रफिक साबीर, शाम गायकवाड, दिनकर गायकवाड, पेस शेख, गफार शेख, फारुक शेख, सांडू शेख आदी मोठ्या संख्येने पदाधिकारी आणि कार्यकर्ते उपस्थित होते.

नाशिक शहर काँग्रेसच्या वतीने देखील सोलापूरकर यांचा निषेध करण्यात आला आहे. भद्रकाली पोलीस ठाण्यात शहर काँग्रेस तर्फे निवेदन देण्यात आले. अभिनेते सोलापूरकर यांच्या विरोधात देशद्रोहाचा गुन्हा दाखल करावा, अशी मागणी यावेळी शहराध्यक्ष आकाश छाजेड आणि पदाधिकाऱ्यांनी केली आहे

अभिनेते राहुल सोलापूरकर यांनी गेल्या आठवड्यात एका वाहिनीच्या मुलाखतीत छत्रपती शिवाजी महाराजांबद्दल वादग्रस्त विधान केले होते. त्याचे पडसाद नाशिक जिल्ह्याच्या ग्रामीण भागातही उमटत आहेत. रोज विविध संघटना आंदोलन करीत आहेत त्यामुळे हा विषय आणखी काही दिवस चर्चेत राहण्याची शक्यता आहे.

-----