Karnataka Result News : स्थानिक अँटी इनकमबन्सीमुळे हा निकाल लागला असावा!

Karnataka result 2023 : कर्नाटक विधानसभेच्या निवडणुकीचे निकाल काहीही लागला तरी त्याचा भाजपवर फार मोठा परिणाम होणार नाही. स्थानिक अँटी इनकमबन्सी मुळे हा निकाल लागला असावा, असे मत राज्याचे महसूल मंत्री डॉ. राधाकृष्ण विखे-पाटील यांनी व्यक्त केली. (Karnataka Election result is a impact of anti incumbancy)

महसूल मंत्री डॉ. राधाकृष्ण विखे- पाटील (Radhakrishna Vikhe-patil) यांनी कर्नाटक (Karnataka) विधानसभा निवडणुकीच्या निकालावर आपले मत व्यक्त केले आहे. भाजपचा (BJP) पराभव स्थानिक विषयांमुळे झाला, असा दावा केला आहे.

डॉ. विखे पाटील आज नाशिक दौऱ्यावर होते. यावेळी कर्नाटक विधानसभा निवडणुकीच्या निकालाबाबत त्यांना विचारले असता त्यांनी आपली प्रतिक्रीया दिली. ते म्हणाले, सध्याचे हे निकाल सुरवातीचे येत आहेत. दुपारपर्यंत संपुर्ण चित्र स्पष्ट होईल. आता जे निकाल येत आहेत त्यात खूप फरक नाही. खूप मोठा फटका पक्षाला नाही. पूर्ण निकाल आल्यावर चर्चा त्यावर होईल.

स्थानिक राज्याचे निवडणुकांचे विषय वेगळे असतात. केंद्र सरकारशी त्याला जोडणे बरोबर नाही. हे निकाल कदाचीत अँटी इन्कमबन्सीचा परिणाम असावा. संपूर्ण निकाल हाती आल्यावर त्यावर केंद्रीय नेतृत्वाची प्रतिक्रया येईल.

शिवसेनेचे खासदार संजय राऊत यांनी सर्वोच्च न्यायालयाच्या निकालाबाबत राज्य सरकारवर केलेल्या आरोपांबाबत ते म्हणाले, संजय राऊत यांना पोपटपंची करण्याची जवाबदारी त्यांच्या पक्षाने दिली आहे. त्यांनी आपल्या पात्रतेपेक्षा अधिक बोलू नये, असा चिमटा त्यांनी घेतला. त्यांमुळे राऊत यांच्यासारख्या भाडोत्री माणसावर काय काय भाष्य करणार. ते काहीही म्हटले तरीही राज्यातील सरकार पडणार नाही. राऊत यांची भविष्यवाणी कधीही खरी झालेली नाही. त्यामुळे त्यांच्याकडे दुर्लक्ष करा. पुढे जाऊन त्यांचा पक्ष त्यांच्याबाबत काय करेल माहिती नाही. या वैफल्यग्रस्त झालेल्या माणसावर काही दिवसांनी त्यांच्या डोक्यावर परिणाम झालेला दिसेल.