Eknath Shinde politics; शिवसेनेच्या मंत्र्यांचा एकनाथ शिंदेंना चिमटा की गुदगुल्या?, म्हणाले...

Sanjay Shirsath News: चाळीस आमदारांसह शिवसेनेतून बाहेर पडलेले एकनाथ शिंदे सध्या उपमुख्यमंत्री आहेत. यापूर्वी ते मुख्यमंत्री होते. त्यामुळे ते सातत्याने राजकीय चर्चेचे केंद्र राहिले आहे. आता त्यांच्याच सहकारी मंत्र्यांनी केलेल्या विधानाने त्यांच्या विधानाची पुन्हा चर्चा होत आहे.

राज्याचे सामाजिक न्याय मंत्री आणि शिवसेना एकनाथ शिंदे पक्षाचे नेते संजय शिरसाठ नुकतेच येवला दौऱ्यावर होते. यावेळी त्यांचा आमदार किशोर दराडे यांनी संपत्ती सत्कार केला. यावेळी झालेल्या कार्यक्रमात मंत्री शिरसाठ यांनी केलेले विधान चर्चेचा विषय बनले आहे.

यावेळी सामाजिक न्याय मंत्री संजय शिरसाठ यांनी शिवसेनेतून बाहेर पडल्याचे समाधान व्यक्त केले. ते म्हणाले, आम्ही सर्व शिवसेनेतून बाहेर पडलो. त्यामुळे आमचा फायदाच झाला. जे आमच्या सोबत आले त्यांना विविध पदे मिळाली. सत्तेत सहभागी होत आले. जे आले नाहीत, त्यांचे हाल झाले. त्यामुळे आम्ही जो काही निर्णय घेतला तो निर्णय योग्य झाला, असा दावा त्यांनी केला.

यावेळी ते म्हणाले, मी काही टाटा- बिर्ला किंवा विखे पाटलांच्या घरात जन्माला आलेलो नाही. मला कोणतीही राजकीय पार्श्वभूमी नाही. मी अतिशय साधारण कुटुंबातून पुढे आलो आहे. माझ्यात क्षमता होती, म्हणून पक्षाने मला संधी दिली. त्यामुळेच मला राजकारणात मोठी संधी मिळाली. राजकारणात पुढे जाण्यासाठी मला कोणत्याही गॉडफादरची गरज नाही, असा टोलाही त्यांनी लगावला.

ते म्हणाले, सध्या अडीच वर्षांसाठी मंत्र्यांची नियुक्ती झाली आहे. त्यानंतर त्यांची कार्यक्षमता आणि आढावा घेऊन पुढे संधीचा विचार होईल. मात्र सध्या राजकारणाचा विचार करता रिक्षावाल्यांना चांगले दिवस आले आहेत, असा चिमटा त्यांनी घेतला.

बाभुळगाव (येवला) येथील एस. एन. डी. अभियांत्रिकी महाविद्यालयात आमदार दराडे यांनी सामाजिक न्याय मंत्री शिरसाठ यांचा सत्कार केला. यावेळी पक्षाचे विविध पदाधिकारी उपस्थित होते.

-----