पॉर्नोग्राफीचा आरोप असलेले राज कुंद्रा शिल्पा शेट्टीसह सप्तशृंगीचरणी!

वणी : बॉलिवूड अभिनेत्री शिल्पा शेट्टी (Shilpa Shetty) आणि उद्योगपती राज कुंद्रा (Raj Kundra) या दांपत्याने मंगळवारी दुपारी सप्तशृंगगडावर आदिशक्ती सप्तशृंगीदेवीचे दर्शन घेतले. त्यांना पाहण्यासाठी चाहत्यांनी गडावर मोठी गर्दी केली होती.

राज कुंद्राला मुंबई पोलिसांच्या गुन्हे शाखेने पॉर्नोग्राफीच्या आरोपाखाली १९ जुलैला अटक केली होती. त्यानंतर शिल्पाची देखील चौकशी करण्यात आली होती. या प्रकरणामुळे चर्चेत आलेले हे दांपत्य गत वर्षी हिमाचल प्रदेशात स्पॉट झाले होते. या कालावधीत दोघांनी जम्मूमधील वैष्णोदेवी मंदिरात दर्शनासाठी १३ किलोमीटर पदयात्रा केली. तसेच, हिमाचल प्रदेशातील कांगडा जिल्ह्यात शत्रुनाशिनी माँ बगलामुखी मंदिर (बनखंडी) येथे एकत्र पूजा केली. चामुंडादेवी मंदिर आणि ज्वालामुखी मंदिरात जाऊन दर्शनही घेतले होते. अशा पार्श्‍वभूमीवर दोघे मंगळवारी दुपारी दीडच्या सुमारास सप्तशृंगगडावर दाखल झाले.

फनिक्युलर ट्रॉलीद्वारे मंदिरात जाऊन ते सर्वसामान्य भाविकांप्रमाणे आदिमायेचरणी नतमस्तक झाले. सप्तशृंगीमातेच्या दर्शनासाठी प्रथमच आल्याचे व आम्ही भगवतीच्या दर्शनाने अतिशय आनंदित झाल्याचे त्यांनी सांगितले. मंदिरात केवळ पाच मिनिटे थांबून दर्शन घेतल्यानंतर दोघांनीही ट्रस्टच्या प्रसादालयात जाऊन महाप्रसादाचा लाभ घेतला. सप्तशृंगी निवासिनी देवी संस्थानतर्फे व्यवस्थापक सुदर्शन दहातोंडे, जनसंपर्क अधिकारी भिकन वाबळे, कार्यालयीन अधीक्षक प्रकाश जोशी, नानाजी भामरे यांनी त्यांना आदिमायेची प्रतिमा व प्रसाद देत सत्कार केला.

दरम्यान, सुरवातीला मास्क घातलेले असल्यामुळे शिल्पा शेट्टीला कुणीही ओळखले नाही. मात्र, मास्क काढताच सर्वत्र शिल्पा शेट्टी गडावर आल्याची वार्ता पसरली. त्यामुळे चाहत्यांची भक्तनिवास परिसरात मोठी गर्दी झाली होती. पोलिसांनी हस्तक्षेप करून गर्दी दूर केली.

----