गिरीशभाऊंनी मला सरकारमध्ये एकट सोडल...

जळगाव : गेल्या काही दिवसांपासून राज्यात भाजप (BJP) आणि महाविकास आघाडीच्या (Mahavikas Aghadi) नेत्यांमध्ये चांगलेच शाब्दिक युद्ध रंगत आहे. दोन्ही बाजुच्या नेत्यांकडून एकमेकांवर टीका करण्याची कुणीही संधी सोडत नाही. मात्र, जळगावमध्ये शिवसेना (Shivsena) नेते आणि राज्याचे पाणीपुरवठा मंत्री गुलाबराव पाटील (Gulabrao Patil) आणि भाजप नेते आणि माजी मंत्री गिरीश महाजन (Girish Mahajan) यांच्यात खेळीमेळीचे वातावरण पाहायला मिळाले. गिरीशभाऊंनी मला सरकारमध्ये एकट सोडल आणि आज रामनवमी निमित्ताने मंदिरात श्रीरामाच्या दर्शनासाठी सोबतही घेऊन गेले नाही, असा चिमटा पाटलांनी महाजनांना काढला. ते जळगाव येथे एका शिबिरात बोलत होते. यावेळी केंद्रीय आरोग्य मंत्री डॉ. भारती पवार, (Bharti Pawar) गिरीश महाजन, खासदार उन्मेष पाटील हे उपस्थित होते.

आज रामनवमी निमित्ताने जळगाव शहरात विविध कार्यक्रमाचे आयोजन करण्यात आले आहे. आज (ता.10 एप्रिल) महाजन हे राम दर्शनासाठी राम मंदिरात गेले. नेमके याच मुद्द्यावरून गुलाबराव पाटलांनी महाजनांना टोमणा लगावला. पाटील म्हणाले, आपण सोबत मंदिराच श्रीरामाच्या दर्शनासाठी जाणार होतो, असे आपले ठरले होते. मात्र, महाजनांनी जसे सरकारमध्ये मला सोडल तसे आज मंदिरात सोबत घेऊन न जाता एकटेच दर्शनाला गेले, असा मिस्किल टोला लगावला. यावेळी उपस्थितांमध्ये मात्र एकच हशा पिकला होता.

दरम्यान, राज्यात सत्ताधारी महाविकास आघाडीचे नेते आणि भाजप नेत्यामध्ये रोज आरोप प्रत्यारोपांच्या फैरी झडत असतांना, जळगावात मंत्री गुलाबाराव पाटील आणि महाजन यांच्यात खेळीमाळीचे वातावरण जळगावासीयांना बघायला मिळाले आहे. सुमारे 25 वर्ष युतीत सोबत काढलेल्या शिवसेना आणि भाजपच्या नेत्यांचे आजही जिव्हाळ्याचे संबध आहेत. मात्र, मुख्यमंत्रीपदावरून युती तुटल्याने या दोन्ही पक्षातील नेत्यांमध्ये दुरावा बघायला मिळत आहे.