Ahilyanagar political meeting : स्थानिक स्वराज्य संस्थांच्या निवडणुकीसाठी महाविकास आघाडीत जागा वाटप कशा होणार याकडे लक्ष लागले असतानाच, शिवसेना उद्धव बाळासाहेब ठाकरे सेना पक्षाचे जिल्हाप्रमुख शशिकांत गाडे यांनी जागा वाटप कशा होणार, यावर भाष्य केले आहे.
महाविकास आघाडीत जागा वाटपाचं काहीही होऊ द्या, पण जिथं शिवसेनेचे आजी-माजी होते, तिथं 'माशल' घेऊनच लढणारच, असे शशिकांत गाडे यांनी स्पष्ट करत, महाविकास आघाडीतील जागा वाटपावर लवकरच राष्ट्रवादी काँग्रेस पार्टी शरद पवार पक्षाचे खासदार नीलेश लंके यांच्याशी चर्चा करणार असल्याचे सांगितले.
शिवसेना पक्षप्रमुख उद्धव ठाकरे यांनी स्थानिक स्वराज्य संस्थांच्या निवडणुकीसाठी तयारीला लागा, असा आदेश दिला आहे. शिवसेना ठाकरे सेना पक्ष पूर्ण ताकदीने ही निवडणूक लढणार आहे. महाविकास आघाडीतील (MVA) जागा वाटपाबाबत वरिष्ठ पातळीवर चर्चा सुरू आहे. परंतु जिथं शिवसेनेचे आजी-माजी होते, तिथं 'मशाल' घेऊनच लढणार असल्याचे शिवसेनेचे जिल्हाप्रमुख प्रा. शशिकांत गाडे यांनी बैठकीत स्पष्ट केले.
शिवसेनेचे जिल्हाप्रमुख शशिकांत गाडे यांच्या मार्गदर्शनाखाली अहिल्यानगर शहरातील शिवसेना ठाकरे सेना पक्षाची बैठक झाली. अहिल्यानगर शहरासह, नगर तालुका, पारनेर तालुका व श्रीगोंदा तालुक्यातील शिवसेनेचे महत्त्वाचे पदाधिकारी उपस्थित होते. या बैठकीस पक्षप्रमुख उद्धव ठाकरे (Uddhav Thackeray) यांच्या विचारांवर श्रद्धा ठेवणारे आणि महाराष्ट्र धर्मासाठी सज्ज असलेले शिवसैनिक निवडणुकांमध्ये पूर्ण ताकदीने उतरण्याचा निर्धार मांडण्यात आला.
प्रा. गाडे म्हणाले, "शिवसेनेचे ज्या गटात, गणात व प्रभागात विद्यमान सदस्य व नगरसेवक आहेत, त्या जागा शिवसेनेकडेच राहतील. इच्छुक उमेदवारांनी आता निवडणुकीसाठी सज्ज व्हावे. तसेच खासदार लंके यांच्यासमवेत बैठकीचे आयोजन करून आगामी निवडणुकांसाठी महाविकास आघाडीतील जागावाटप निश्चित करू".
शिवसेना आता नव्या जोमाने जनतेसमोर जात असून, स्थानिक पातळीवरील प्रश्न, विकासकामे, शेतकरी, तरुण, महिला आणि सामान्य जनतेच्या हितासाठी समर्पित भावनेने काम करणार आहे. युवा सेनेचे सहसचिव विक्रम राठोड, उपजिल्हाप्रमुख गिरीश जाधव, नगर तालुका प्रमुख राजेंद्र भगत, डॉ. भास्कर शिरोळे, पारनेर तालुका प्रमुख डॉ. श्रीकांत पठारे, उपजिल्हाप्रमुख बाळासाहेब दुतारे यांच्यासह प्रमुख पदाधिकारी उपस्थित होते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.