Shivsena Politics : DCM शिंदेच्या शिलेदारांना टीका जिव्हारी लागली; खासदार राऊतांविरोधात थेट लाख रुपयाच्या बक्षिसाची घोषणा केली

Ahilyanagar News : शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी काही दिवसांपूर्वी शिवसेना नेते उपमुख्यमंत्री एकनाथ शिंदे यांच्यावर टीका केली होती. उपमुख्यमंत्री शिंदे यांच्या अहिल्यानगरमधील शिलेदारांच्या ही टीका जिव्हारी लागली.

या टीकेचा निषेध नोंदवताना, खासदार संजय राऊत यांना काळे फासणाऱ्याला एक लाख रुपयांचे बक्षीस देऊ, अशी घोषणा केली. या बक्षिसाच्या घोषणामुळे DCM शिंदे यांच्या शिलेदारांचं हे आंदोलन चर्चेत आलं आहे.

खासदार संजय राऊत यांनी दोन दिवसांपासून एकनाथ शिंदे (Eknath Shinde) कायम अस्वस्थ आत्मा आहे. त्यांना महाकुंभमेळ्यात जाऊन बसायला पाहिजे होतं. नागा साधूंबरोबर. नागा साधूही अस्वस्थ असतो फार. अघोरी विद्या करतात. नाचतात, अशी टीका केली होती. खासदार राऊत यांच्या या टीकेचे पडसाद आता उमटू लागले आहेत. खासदार राऊत यांच्या या टीकेवर DCM शिंदे यांच्या शिवसेनेचे पदाधिकारी-कार्यकर्ते आक्रमक झाले आहेत.

DCM एकनाथ शिंदे यांच्या अहिल्यानगरमधील शिवसेनेचे (Shivsena) शहरप्रमुख सचिन जाधव यांच्या नेतृत्वाखाली खासदार संजय राऊत यांच्याविरोधात आंदोलन करण्यात आले. खासदार राऊत यांच्या विधानाचा निषेध करण्यात आला. तसेच त्यांच्या प्रतिमेला जोडे मारण्यात आले. अहिल्यानगर शहरातील दिल्ली दरवाजा इथं शिवसेना पदाधिकारी आणि कार्यकर्त्यांनी हे आंदोलन केले.

शहरप्रमुख सचिन जाधव यांनी खासदार संजय राऊत यांच्या वक्तव्याचा निषेध करताना, 'कुंभमेळा हा हिंदू धर्मियांचे आस्थेचे प्रतीक आहे. इथं सर्व जातीभेद विसरून देशातील प्रत्येक माणूस कुंभमेळ्यात सहभागी होतो. खासदार संजय राऊत यांनी केलेले वक्तव्य चुकीचे आहे. हिंदू धर्मियांच्या भावना दुखावण्याचे काम खासदार राऊतांनी केले आहे. त्यांच्या या कृतीचा निषेध आम्ही करतो', असे सांगितले.

शिवसैनिकांनी केलेल्या निषेध आंदोलनानंतर शिवसेना शहरप्रमुख सचिन जाधव यांनी खासदार संजय राऊत यांच्याबाबत मोठा घोषणा केली. खासदार राऊत यांच्या तोंडाला कोणी काळे फासेल, त्यास एक रुपये बक्षीस दिले जाईल. हे बक्षीस थेट रोख स्वरुपात, असेही सचिन जाधव यांनी सांगितले.