Nashik Simhastha Kumbh : ‘हिंदू धर्माचे महत्त्व सांगू नका’; सिंहस्थ बैठकीत आयुक्त-माजी महापौर आमनेसामने

Nashik Municipal Corporation : सिंहस्थ कुंभमेळ्याच्या विकास कामांचा वाद गाजतो आहे. महापालिका आणि शासनावर विरोधकांकडून टीका होत आहे. या पार्श्वभूमीवर झालेल्या ध्वजारोहणाच्या बैठकीत झालेली खडाजंगी चर्चेत आहे.

सिंहस्थ कुंभमेळ्याचे ध्वजारोहण पुरोहित संघातर्फे येत्या 31 ऑक्टोबरला होत आहे. या कार्यक्रमाच्या तयारीसाठी शहरात सर्वपक्षीय बैठक झाली. या बैठकीत महापालिका आणि तयारीवर प्रश्नचिन्ह उपस्थित करण्यात आले.

या बैठकीत माजी महापौर दशरथ पाटील यांनी टीका केली. अनेक कुंभमेळे पाहिले आहेत मात्र एवढा गलथान कारभार यापूर्वी कधीही नव्हता. नाशिक (Nashik) महापालिकेने कामकाजात तातडीने सुधारणा करावी. हिंदू धर्माचे महत्त्व ओळखा अन्यथा त्याचा कुंभमेळावर परिणाम होईल, असे पाटील म्हणाले.

प्रशासनावर थेट टीका झाल्याने महापालिका आयुक्त चांगल्याच संतापल्या. त्यांनीही माजी महापौर पाटील यांना थेट सुनावले. हिंदू (Hindu) धर्माचे महत्त्व सांगण्याचा प्रयत्न करू नका. तुम्ही काही मंदिरे पाडण्यासाठी पत्र दिले होते, असे आयुक्तांनी सुनावले.

महापौर हिमगौरी आडके यांसह विविध लोकप्रतिनिधी या बैठकीला उपस्थित होते. सिंहस्थ कुंभमेळ्याची सुरुवात पुरोहित संघाच्या ध्वजारोहणाने होते. संदर्भात चर्चा करण्यासाठीच्या बैठकीत वेगळाच वाद उद्भवल्याने तो चर्चेचा विषय ठरला.

कुंभमेळ्याची कामे अन् नागरिकांना त्रास

कुंभमेळ्याची अनेक कामे अद्याप अपूर्ण आहेत. त्यामुळे कुंभमेळ्याच्या तयारीवर त्याचा परिणाम होणार आहे. नागरिकांना त्याचा त्रास सहन करावा लागत आहे. त्याचे काय करणार असा प्रश्न यावेळी लोकप्रतिनिधींनी प्रशासनाला केला.

प्रशासनाचे फक्त आश्वासन

प्रशासनाकडून ध्वजारोहणापूर्वी महत्त्वाची कामे पूर्ण करण्याचा प्रयत्न केला जाईल असे आश्वासन देण्यात आले. यावेळी काँग्रेस शहराध्यक्ष बबलू खैरे यांनी कुंभमेळा हा सर्वपक्षीय आहे. त्याला एका पक्षाचा कार्यक्रम असे स्वरूप येऊ देऊ नका, असा इशारा दिला. यावेळी उपमहापौर विलास शिंदे माजी आमदार बाळासाहेब सानप महंत भक्ती चरणदास यांचे विविध लोकप्रतिनिधी उपस्थित होते.