Narayan Patil meets Ram Shinde : राम शिंदे राजकीय भूकंप घडवण्याच्या तयारीत; पवारसाहेबांच्या आमदारानं घेतली भेट, बंद दाराआड दोघांमध्ये बरचं काही शिजलं

Maharashtra political news : विधान परिषदेचे सभापती प्रा. राम शिंदे यांचा राज्याच्या राजकारणात सर्वाधिक संघर्ष कोणाशी राहिला असेल, तर तो म्हणजे, शरद पवार यांचे नातू आमदार रोहित पवार आणि त्यापाठोपाठ भाजप मंत्री राधाकृष्ण विखे पाटील यांच्याशी. अलीकडच्या काळात आमदार पवार यांच्याशी राजकीय संघर्ष शिगेला पोचला असून, त्यातून राम शिंदेंनी थेट शरद पवार यांना देखील आव्हान देण्यास सुरुवात केली आहे.

शरद पवार यांच्या पक्षाचे आमदार नारायण आबा पाटील यांनी शनिवारी रात्री चौंडी (ता. जामखेड) गाठत राम शिंदेंची तब्बल अर्धा तास बंद दाराआड चर्चा केली. या चर्चेचा तपशील दोघांकडून सांगितला जात नसला, तरी वेळ आणि टायमिंग पाहता, राम शिंदे आता राज्याच्या राजकारणात भूकंप घडवण्याच्या तयारीत असून, त्याचा पहिला धक्का शरद पवार यांना देणार की काय, असे संकेत मिळू लागले आहेत.

सोलापूरमधील आदिनाथ सहकारी साखर कारखाना निवडणूक नुकताच झाली. ही निवडणूक चुरशीची झाली. यात आमदार नारायण आबा पाटील यांच्या नेतृत्वाखालील पॅनलने विजय मिळवला. शरद पवार गटाचे आमदार रोहित पवार (Rohit Pawar) यांनी या निवडणुकीत आपल्याच पक्षाचे आमदार नारायण पाटील यांच्या पॅनल विरोधात काम केल्याचा आरोप आहे. आमदार नारायण पाटील यांनीच तसा आरोप केला आहे. असे असतानाही नारायण पाटील यांच्या पॅनलने कारखाना निवडणुकीत विरोधकांचा धुव्वा उडवला आणि कारखान्यावर एकहाती सत्ता स्थापन मिळवली. त्यामुळे ही निवडणूक राज्यात चांगलीच गाजली होती.

आमदार नारायण आबा पाटील आपल्यासह नवनिर्वाचित संचालकांसह शनिवारी सायंकाळी चौंडी (ता. जामखेड) इथं दाखल झाले. विधानपरिषदेचे सभापती राम शिंदे (Ram Shinde) यांची तिथं निवासस्थानी भेट घेतली. राम शिंदे आणि नारायण पाटील या दोघा नेत्यांमध्ये तब्बल अर्धा तास बंद दाराआड चर्चा झाली. ही चर्चा आता राज्याच्या राजकारणाचा विषय बनली आहे. या दोघा नेत्यांमध्ये नेमकी कोणत्या मुद्यावरून चर्चा झाली, याचा आता आखाडे बांधले जाऊ लागले आहेत.

चौंडी (ता. जामखेड) इथं 6 मे रोजी मंत्रिमंडळाची बैठक होत आहे. या बैठकीच्या तयारीच्या नियोजनात राम शिंदे व्यस्त असतानाच नारायण पाटील यांनी घेतलेली भेट चर्चेत आली. ही भेट नियोजित होती, अशी माहिती समोर येत आहे. परंतु राम शिंदे यांच्या निकटवर्तीयांकडून मात्र, या भेटीबाबत कोणतीही पूर्वकल्पना नव्हती, अशी माहिती समजली.

राम शिंदे यांनी आमदार नारायण पाटील आणि आदिनाथच्या नवनिर्वाचित संचालकांचा सत्कार केला. शेतकरी हितासाठी मी तुमच्या पाठीशी खंबीरपणे उभा आहे, असा शब्द यावेळी राम शिंदेंनी संचालकांना दिला. राम शिंदेंनी दिलेला शब्द मोठा असल्याने, दोन्ही नेत्यांमध्ये बंद दाराआड झालेली चर्चा विरोधक अधिक चघळू लागलेत.