Manikrao Kokate : एकनाथ शिंदेंची मांडी खूप छोटीये, मंत्री कोकाटेंनी का उडवली खिल्ली?

Maharashtra politics : नंदुरबार जिल्ह्यात उपमुख्यमंत्री एकनाथ शिंदे यांनी केलेल्या एका घोषणेवरून पालकमंत्री माणिकराव कोकाटे यांनी त्यांना उपरोधात्मक टोला लगावला आहे. शिंदेंनी केलेल्या घोषणेची एकप्रकारे कोकाटेंनी खिल्ली उडवली आहे.

जिल्ह्यातील तळोदा नगरपरिषद निवडणुकीच्या प्रचारासाठी एकाच दिवशी उपमुख्यमंत्री एकनाथ शिंदे आणि क्रीडामंत्री माणिकराव कोकाटे यांच्या सभा झाल्या. सुरुवातीला पहिल्या सत्रात एकनाथ शिंदे यांची सभा झाली. सभेत शिंदेंनी तळोदा शहराच्या विकासासाठी तळोदा नगरपरिषद दत्तक घेण्याची घोषणा केली. शिवसेनेचे नगराध्यक्षपदाचे उमेदवार हितेंद्र क्षत्रीय यांच्या प्रचारसभेत ते बोलत होते.

तसेच लाडकी बहीण योजना आपल्या काळातच सुरु झाली असून कोणीही आले तरी ही योजना बंद पडू देणार नसल्याचे त्यांनी सांगितले. देशामध्ये जहागिरीदारी संपली आहे. मात्र, तळोद्यात ती आजही सुरू आहे. त्यामुळे तळोद्याला जहागिरीदारीच्या पाशातून मुक्त करणार आहे. असे आश्वासन देखील एकनाथ शिंदे यांनी दिले.

एकनाथ शिंदे यांच्या सभेनंतर तळोद्यात नंदुरबारचे पालकमंत्री माणिकराव कोकाटे यांची सभा झाली. मंत्री माणिकराव कोकाटे यांनी एकनाथ शिंदे यांच्या तळोदा दत्तक घेण्याच्या घोषणेची खिल्ली उडवली. कोकाटे म्हणाले, आमच्या माजी मुख्यमंत्र्यांची मांडी खूप छोटी आहे. प्रत्येक नगरपालिकेला दत्तक घेण्याचे त्यांनी आश्वासन दिले आहे. पण त्यांना मर्यादा आहेत असा टोला कोकाटेंनी लगावला.

मागच्या दहा वर्षांपासून नगरविकास खाते हे एकनाथ शिंदे यांच्याकडेच आहे. असे असतानाही त्यांनी तळोदा नगरपरिषदेसाठी पुरेसा निधी दिला नसल्याचे कोकाटे म्हणाले. दत्तक घायचं त्यांनी घ्यावं. यावर माझं काही दुमत नाही. तो त्यांचा राजकीय स्टंटही असू शकतो असं कोकाटे म्हणाले. राष्ट्रवादीच्या उमेदवार भाग्यश्री योगेश चौधरी यांच्या प्रचारार्थ घेतलेल्या सभेतून त्यांनी हा टोला लगावला.

तळोदा नगरपरिषदेमध्ये भाजपचे जितेंद्र सुर्यवंशी, शिवसेनेचे (शिंदे गट) हितेंद्र क्षत्रीय आणि राष्ट्रवादीच्या (अजित पवार) भाग्यश्री चौधरी यांच्यात लढत होणार आहे. निवडणुकीचा प्रचार शेवटच्या टप्प्यात असल्याने महायुतीमधले सर्वच घटक पक्ष आता एकमॆकांवर ताशेरे ओढून मतदारांना आपल्याकडे खेचण्याचा प्रयत्न करतांना दिसत आहे.