VBA–Congress Alliance : काँग्रेस-वंचितची अधिकृत युती जाहीर, 'या' नगरपालिकांमध्ये दाखवणार ताकद; जागा वाटपाचा फाॅर्म्युला निश्चित

Buldhana Politics : विधानसभा आणि लोकसभेत वंचित आणि काँग्रेसमध्ये युतीची चर्चा सुरू होती. मात्र, ऐनवेळी वंचितने माघार घेत स्वबळाचा नारा दिला. स्थानिक स्वराज संस्था निवडणुकीत वंचित, काँग्रेस एकत्र लढणार असल्याची चर्चा होती. ती खरी ठरली आहे. वंचित आणि काँग्रेसच्या अधिकृत युतीची घोषणा करण्यात आली आहे.

बुलढाणा जिल्ह्यात वंचित-बहुजन आघाडी एकत्र लढणार असून दोन्ही पक्षांमध्ये ५०-५० टक्के जागावाटप निश्चित झाले असून, या आधारे नगरपालिकांच्या निवडणुकांसाठी दोन्ही पक्षांनी रणनीती आखण्यास सुरुवात केली आहे.

बुलढाणा, सिंदखेडराजा, देऊळगावराजा आणि लोणार तसेच खामगाव, शेगाव आणि जळगाव जामोद या नगरपालिकांमध्ये नगराध्यक्षपदाच्या निवडणुका वंचित-काँग्रेस युतीमध्ये लढवणार आहे.

काँग्रेस नेते विजय वडेट्टीवार यांनी दोन दिवसांपूर्वी वंचितसोबत स्थानिक पातळीवर युती करणार असल्याचे सांगितले होते. स्थानिक गणितं लक्षात घेत वंचित, बसपासोबत जाणार असल्याचे त्यांनी म्हटले होते. अखेर बुलढाण्यामध्ये वंचित आणि काँग्रेस अधिकृतरित्या एकत्र आले आहेत.

वंचितचे बुलढाणा जिल्हा प्रभारी प्रदीप वानखेडे म्हणाले, वंचित बहुजन आघाडी बुलढाणा जिल्ह्यातील सर्व उमेदवार, संघटनात्मक तयारी, प्रचार आराखडा आणि कार्यकर्त्यांचे नियोजन पूर्ण केले आहे. या युतीमुळे जिल्ह्यात मजबूत पर्याय उभा राहील आणि दोन्ही पक्षांना चांगले यश मिळेल.