Aditya Thackeray News : आता भावी मुख्यमंत्र्यांच्या यादीत 'या' नेत्याचीही भर; नागपुरात झळकले बॅनर

Aditya Thackeray Nagpur Tour : माजी पर्यावरण मंत्री आदित्य ठाकरे आज सोमवारी (ता. २२) नागपूरच्या दौऱ्यावर आहेत. या पार्श्वभूमीवर त्यांच्या स्वागताचे नागपूर शहरात ठिकठिकाणी स्वागताचे बॅनर लागले आहेत. त्यात काही बॅनर मात्र लक्षवेधी ठरत आहेत. त्यावर आदित्य ठाकरे यांचा भावी मुख्यमंत्री असा उल्लेख करण्यात आला आहे. त्यामुळे भावी मुख्यमंत्रीपदावरून राज्यभरात पुन्हा चर्चांना उधाण आले आहे.

काही महिन्यांपासून राज्यात अनेकांचे भावी मुख्यमंत्री म्हणून बॅनर्स लागत आहेत. यात विरोधी पक्षनेते अजित पवार (Ajit Pawar), उपमुख्यमंत्री देवेंद्र फडणवीस यांच्यासह इतर नेत्यांचेही काही ठिकाणी फलक लागले होते. त्यातच आता ठाकरे गटाचे आमदार आदित्य ठाकरे यांचा भावी मुख्यमंत्री असा उल्लेख केलेले बॅनर नागपूरात लागले आहेत. त्यामुळे मुख्यमंत्रीपदाच्या शर्यतीत आणखी एका नेत्याची भर पडल्याच्या चर्चा सुरू झाली आहे. (Marathi Latest News)

नागपूर दौऱ्यात पर्यावरण मंत्री राहिलेले आदित्य ठाकरे (Aditya Thackeray) कोराडी वीज प्रकल्पामुळे प्रदूषणाचा सामना करणाऱ्या नांदगाव आणि वराडा गावाला ते भेट देणार आहेत. संबंधित गावांतील लोकांशी संवाद साधणार आहेत. त्यामुळे आदित्य यांच्या नागपूर दौऱ्याकडे सर्वांचे लक्ष लागलेले आहे. दरम्यान, ते नागपूरला येण्यापूर्वीच रामटेक आणि कन्हान येथील रस्त्यांवर आणि बस स्टॉपवर काही बॅनर्स लागले आहेत. त्यात त्यांचा भावी मुख्यमंत्री असा उल्लेख केला आहे. या फलकांवर 'भावी मुख्यमंत्री आदित्य ठाकरे साहेब, आपले रामटेक विधानसभा मतदारसंघात हार्दिक स्वागत', असा मजकूर आहे.

ठाकरे गटाचे युवा सेना जिल्हाप्रमुख लोकेश बावनकर आणि उपजिल्हाप्रमुख समीर मेश्राम यांनी हे बॅनर्स लावले आहेत. त्यावर शिवसेना पक्षप्रमुख बाळासाहेब ठाकरे, माजी मुख्यमंत्री उद्धव ठाकरे आणि आदित्य ठाकरे यांच्यासह बावनकर आणि मेश्राम यांचेही फोटो आहेत. दरम्यान, काही दिवसांपूर्वी नागपूरात उपमुख्यमंत्री देवेंद्र फडणवीस (Devendra Fadnavis) यांचे भावी मुख्यमंत्री म्हणून बॅनर झळकले होते. त्यानंतर आता आदित्य यांचे भावी मुख्यमंत्री म्हणून बॅनर लागले आहेत. त्यामुळे विदर्भासह संपूर्ण राज्यात चर्चेला उधाण आले आहे.

(Edited by Sunil Dhumal)