Ajit Pawar : "अजितदादांनी थांबवलं तरी, भाजपच्या आमदाराविरोधात लढणार", 'NCP'तील नेत्या इरेला पेटल्या

पूर्व नागपूर मतदारसंघातून भाजपचे कृष्णा खोपडे हे सलग तीनवेळा विधानसभेला निवडून आले आहेत. आता महायुतीतील राष्ट्रवादी काँग्रेसमधील ( अजित पवार ) माजी नगरसेविकानं कृष्णा खोपडे यांच्यासमोर आव्हान उभ केलं आहे. तसेच, अजितदादांनी बोललं, तरी माघार घेणार नाही, असं माजी नगरसेविकानं ठणकावून सांगितलं आहे. त्यामुळे महायुतीतीलच महिला नेत्यानं आमदार खोपडे यांना आव्हान दिल्यानं अडचण निर्माण होण्याची शक्यता आहे.

आभा पांडे, असं माजी नगरसेविकाचं नाव आहे. "भाजप ( Bjp ) मतदारसंघाचा दावा सोडेल की नाही, माहिती नाही. पण, मी मैदानात उतरणार आहे," असं सांगून आभा पांडे यांनी आमदार खोडपे यांच्याविरोधात मोर्चेबांधणी सुरू केली आहे. तसेच, पूर्व नागपूर मतदारसंघात अनियोजित विकास झाल्याची टीकाही पांडे यांनी केली आहे. त्या एका वृत्तवाहिनीशी संवाद साधत होत्या.

आभा पांडे म्हणाल्या, "मी विधानसभेच्या तयारीला सुरवात केली आहे. लोकशाही आणि राजकारणात जनता ही सर्वतोपरी असते. मी मैदानात उतरावं, असा जनतेचा आग्रह आहे."

तीन टर्म खोपडे हे पूर्व नागपूरमधून आमदार आहेत. लोकसभेला पूर्व नागपूरमधून नितीन गडकरी यांना सर्वाधिक लीड मिळालं आहे. त्यामुळे भाजप दावा सोडेल का? असा प्रश्न विचारल्यावर आभा पांडे यांनी म्हटलं, "भाजप दावा सोडेल का नाही, हे माहिती नाही. पण, मी मैदानात दिसणार आहे. या मतदासंघातून भाजपला नाही, तर गडकरींच्या व्यक्तीमत्त्वाला पाहून नागरिकांनी मतदान केलं आहे. "

"गडकरींना 2019 च्या लोकसभा निवडणुकीत 77 हजारांचं लीड मिळालं होतं. मात्र, आमदार खोपडे हे फक्त 23 हजार मतांनी निवडून आले आहेत. गडकरींना मिळालेल्या मतांवरून विधानसभेचं गणित मांडू शकत नाही," असं आभा पांडे यांनी सांगितलं.

"मागील पंधरा वर्षांपासून आमदार खोडपे हे विकासाच्या बोंबा मारत आहेत. परंतु, तीन तासांच्या पावसामुळे पूर्व नागपूर पाण्यात होते. कुठही पूल बांधण्यात आले आहेत. रस्त्यांची कामे पूर्ण झाली नाहीत. अनियोजित विकासामुळे जनता त्रासली आहे," अशी टीका पांडे यांनी आमदार खोपडे यांच्यावर केली.

हा मतदारसंघ राष्ट्रवादीच्या वाट्याला आला नाहीतर, काय करणार? हा प्रश्न विचारल्यावर आभा पांडे म्हणाल्या, "अजितदादांनी ( Ajit Pawar ) हा मतादरसंघ राष्ट्रवादीकडे घेतला नाही, तरी सुद्धा मी लढणार आहे. माझी तयारी सहा महिन्यांपासून सुरू आहे. अजितदादांनी माघार घेण्यास सांगितलं, तरी मी माघार घेणार नाही. कारण, माझी तयारी खूप पुढे गेली आहे."