News Arena India Survey : भाजपाच्या आकाश फुंडकरांना अन् शिंदे गटाच्या संजय गायकवाडांना बसणार धक्का; काँग्रेसला लागणार लॉटरी...

Maharashtra Assembly Election : महाराष्ट्र विधानसभेच्या निवडणुका आता झाल्या तर भाजपाला सव्वाशे जागा मिळतील, असा अंदाज 'न्यूज अरेना इंडिया' या संस्थेने केलेल्या सर्वेक्षणात व्यक्त करण्यात आला आहे. विदर्भात विधानसभेच्या एकून ६२ जागा आहेत. मात्र, बुलडाण्यातील भाजपची एक आणि शिवसेना (Shivsena) शिंदे गटाची एक जागा धोक्यात असल्याचे सांगितले आहे.

बुलडाणा जिल्ह्यामध्ये भाजपला तीन तर काँग्रेसला दोन आणि शिवसेना शिंदे गटाला 1 जागा मिळेल. राष्ट्रवादी काँग्रेसलाही 1 जागा दाखवण्यात आली आहे. यामुळे बुलडाणा जिल्ह्यामध्ये मागील दोन निवडणुकांमध्ये भाजपा जिंकत असलेली खामगावची जागा मात्र, धोक्यात असल्याचे सांगितेल आहे. तसचे बुलडाणा (Buldhana) विधानसभा मतदारसंघाचे शिवसेना शिंदे गटाचे आमदार संजय गायकवाड यांची जागाही धोक्यात असल्याचा दावा सर्व्हेमध्ये करण्यात आला आहे.

सर्व्हेच्या अंदाजानुसार बुलडाण्याची जागा काँग्रेसला मिळणार असल्याचे सांगितेल आहे. तर खामगावच्या आकाश फुंडकर यांच्या जागेवरही काँग्रेसचे उमेदवार निवडून येणार असल्याचा अंदाज सर्व्हेमध्ये दाखवण्यात आला आहे. तर विदर्भात भाजपाला (BJP) या सर्व्हेनुसार ३० ते ३१ जागा दाखवल्या आहेत. तर शिवसेना (शिंदे गट) अवघ्या पाच जागा मिळण्याचा अंदाज व्यक्त केला आहे. तर शिवसेना ठाकरे गटाला मोठा धक्का बसताना दिसत आहे. त्यांना एकही जागा मिळणार नसल्याचे म्हटले आहे.

तर काँग्रेसला (Congress) २० ते २१ जागा मिळण्याचा अंदाज व्यक्त करण्यात आला आहे. राष्ट्रवादी काँग्रेसलाही अवघ्या दोन जागा दाखवण्यात आल्या आहेत. तर इतर पक्षांना ४ जागा मिळण्याचा अंदाज व्यक्त करण्यात आला आहे. त्यामुळे विदर्भामध्ये सर्व्हेनुसार सगळ्यात मोठा पक्ष भाजपा तर दुसऱ्या क्रमांकावर काँग्रेस आहे.

भाजपला आत्तापर्यंत सर्वाधिक म्हणजे १२३ ते १२९ जागा मिळतील, असा अंदाज वर्तविण्यात आलेला आहे. राष्ट्रवादी काँग्रेसला (NCP) ५५, तर काँग्रेसला ५० ते ५३ जागा मिळणे अपेक्षित आहे. शिवसेना ठाकरे गटाला १७ ते १९ जागा मिळतील, असा अंदाज वर्तविण्यात आला आहे. महाविकास आघाडीने एकत्र निवडणूक लढविली, तर काँग्रेसला सर्वाधिक फायदा होणार असल्याचा अंदाज वर्तविण्यात आला आहे.