Akola Municipal News : अकोला महापालिकेतील सफाई कर्मचाऱ्यांच्या पेन्शनमध्ये सव्वा कोटीचा घोळ!

Akola Municipal Cleaning Staff Pension News :अकोला महापालिकेमध्ये कार्यरत सफाई कर्मचाऱ्यांच्या पेन्शनमध्ये आर्थिक घोळ केल्याप्रकरणी सिटी कोतवाली पोलिसांनी अखेर पेन्शन शाखेचे सेवानिवृत्त लिपिक अशोक गणेशराव सोळंके यांच्यावर फसवणुकीचा गुन्हा पोलिसांनी दाखल केला आहे.

पोलिस सुत्रांनी दिलेल्या माहितीनुसार,1 जानेवारी 2019 ते 31 डिसेंबर 2021 दरम्यान महापालिकेमध्ये अशोक सोळंके यांनी सेवेत नसलेल्या लोकांच्या खात्यात महापालिकेचे पैसे कापून ते पैसे काढून घेतले होते.

असा एकूण 1 कोटी 27 लाख 26,927 रुपयाचा आर्थिक अपहार केला असल्याची तक्रार महापालिकेचे मुख्य लेखाधिकारी अतुल दलाल यांनी सिटी कोतवाली पोलिसात दिली होती.

या तक्रारीवरून 25 जून रोजी आरोपी अशोक सोळंके विरुद्ध अप.नं. 207, कलम 409, 420 भादंवि नुसार गुन्हा दाखल केला आहे. गुन्ह्याचा तपास पोलिस (Police) निरीक्षक सुनील वायदंडे यांच्या मार्गदर्शनाखाली पोलीस उपनिरिक्षक बी.सी.रेघीवाले, आतिष बावस्कर, नवलकार करीत आहेत.

वाल्मिकी सेनेने केला होता खुलासा -

वाल्मिकी सेनेचे संस्थापक अध्यक्ष राहुल सारवान यांनी याप्रकरणाबाबत महापालिकेमध्ये अनेकदा माहिती मागितली. मात्र आधीच्या महापालिका (Corporation) प्रशासनाने माहिती दडपून ठेवली. अखेर विद्यमान अकोला (Akola) मनपा आयुक्त डॉ. सुनील लहाने यांना भेट घेऊन चर्चा करून निवेदन देण्यात आले. तेव्हा प्रकरणाला वाचा फुटली आहे.

मागील दीड वर्षापासून यासंदर्भात पाठपुरावा सुरु होता. महापालिकेतील अधिकारी यासंदर्भात कुठलीही माहिती देण्यास तयार नव्हते. अखेर आज याप्रकरणी संबधिताविरुद्ध गुन्हा दाखल झाला आहे. अशी प्रतिक्रिया वाल्मिकी सेनेचे संस्थापक अध्यक्ष राहुल सारवान यांनी दिली आहे.

(Edited by - Mayur Ratnaparkhe)