Amravati News : राज्यातील नागपूर, नाशिक, कोकण, औरंगाबाद विधान परिषद निवडणुकांचा निकाल जाहीर झाला असला तरी अमरावती पदवीधर मतदार संघातील निकाल जाहीर करण्यात आलेला नाही.मतमोजणीला सुरुवात होऊन तब्बल चोवीस तासांहून अधिक काळ लोटला असला तरी अमरावती मतदारसंघाचा अंतिम निकाल जाहीर करण्यात आलेला नाही. यामुळे मतमोजणीच्या संथ प्रक्रियेवर नाराजी व्यक्त करण्यात येत आहे. अंतिम निकाल जाहीर होण्यास आणखी विलंब होण्याची शक्यता आहे.
अमरावती पदवीधर मतदारसंघात महाविकास आघाडी (MVA) पुरस्कृत धीरज लिंगाडे आणि भाजप उमेदवार ऱणजित पाटील यांच्यात थेट लढत झाली. यावेळी एकूण २३ उमेदवार रिंगणात उभे होते. अमरावती मतदारसंघात ३० जानेवारी रोजी एकूण ४९.७५ टक्‍के मतदान झाले होते. मतमोजणी केंद्रावर गुरूवारी सकाळी ८ वाजता मतमोजणीला सुरूवात झाली. पहिल्या मतमोजणीची गती संथ होती.
पहिल्या पसंतीच्‍या मतमोजणीअखेर महाविकास आघाडीचे धीरज लिंगाडे (Dheeraj Lingade) यांना ४३ हजार ३४० तर भाजपाचे डॉ. रणजित पाटील यांना ४१ हजार २७ मते प्राप्‍त झाली होती. लिंगाडे यांची आघाडी ही त्‍यावेळी २ हजार ३१३ मतांची होती. वैध मतांची संख्‍या ही ९३ हजार ८५२ इतकी असल्‍याने विजयासाठी आवश्‍यक मतांचा कोटा हा ४६ हजार ९२७ मते इतका निश्चित करण्यात आला होता.
यानंतर डॉ. रणजित पाटील (Ranjit Patil) यांच्या प्रतिनिधीने अवैध ठरलेल्‍या ८ हजार ७३५ मतांचे फेरमोजणी करण्‍याची मागणी केली. ही मागणी मान्‍य करण्यात आल्यानंतर रात्री उशिरा पुन्हा एकदा मतपत्रिकांची पडताळणी सुरू करण्यात आली. या पडताळणीत तब्बल अडीच तासांचा वेळ गेला. त्‍यानंतर बाद फेरीची मतमोजणी सुरू करण्यात आली.
आता विजयासाठी आवश्‍यक मतांचा कोटा ४७ हजार ७०१ इतका निश्चित करण्यात आला आहे. अजूनही मतमोजणी सुरू आहे. दुस-या पसंतीच्‍या मतांची मोजणी करण्यात येत असून ही प्रक्रिया वेळखाऊ असल्‍यानं अंतिम निकाल जाहीर होण्यास वेळ लागणार असल्याची माहिती समोर येत आहे.
अमरावती मतदारसंघातील (Amravarti Graduate Election Results) उमेदवारांची जास्‍त संख्‍या, मतमोजणीची संथ प्रक्रिया, पहिल्या पसंतीच्‍या मतमोजणीअखेर अवैध ठरलेल्‍या मतपत्रिकांचे फेरमोजणी करण्‍याची भाजपा उमेदवाराच्या प्रतिनिधींनी केलेली मागणी, या पडताळणीसाठी लागलेला वेळ यांसारख्या अनेक बाबींमुळे अमरावती मतदारसंघाचा अंतिम निकाल अद्याप घोषित करण्यात आलेला नाही.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.