Assembly Election Results : काँग्रेसमधून आलेल्या पारवेंमुळे भाजपचे पारवे पडले! कार्यकर्त्यांकडून आरोपांच्या फैरी

Nagpur News : उमरेड विधानसभा मतदारसंघात भाजपचा धक्कादायक पराभव झाला आहे. याची कारणे आता शोधल्या जात आहे. माजी आमदार पारवे बंधू एकत्र आल्यास भाजपचा विजय सोपा होईल, असे दावे केले जात होते. मात्र उलट झाले. काँग्रेसमधून पक्षात आयात केलेल्या माजी आमदार राजू पारवे यांच्यामुळेच पक्षाचे उमेदवार सुधीर पारवे यांचा पराभव झाल्याचा भाजपच्या कार्यकर्त्यांचा आरोप आहे.

सुधीर पारवे उमरेड विधानसभा मतदारसंघातून दोन वेळा निवडून आले होते. 2019 च्या निवडणुकीत काँग्रेसच्या राजू पारवे यांनी त्यांना पराभूत केले होते. लोकसभेच्या निवडणुकीत त्यांनी शिवसेनेत प्रवेश केला. रामटेक लोकसभा मतदारसंघाचे ते महायुतीचे उमेदवार होते. तेथे ते पराभूत झाले. या कोलांटउड्यांमुळे काँग्रेस आणि भाजपमधून त्यांना उमेदवारी मिळणार नव्हती. त्यांनी बंड केले आणि भाजप नेत्यांच्या विनंतीनंतर माघारही घेतली.

राजू पारवे यांच्या भाजप प्रवेशाला भाजप परिवारातील सर्वांचाच विरोध होता. विधानसभा निवडणूक काळात त्यांना प्रवेश देऊ नका, त्याचा फटका बसेल, याकडेही नेत्यांचे लक्ष वेधण्यात आले होते. प्रवेश द्यायचाच असेल तर निवडणुकीनंतर द्यावा, असेही सांगण्यात आले होते. मात्र राजू पारवे यांनी मोठ्या नेत्यांसोबत संधान साधून मागच्या दाराने तडकाफडकी  प्रवेश करून घेतला. तेथूनच भाजपचे उमेदवार सुधीर पारवे यांच्या पराभवाची चिन्हे गडद झाली.

2019 मध्ये जातीय समीकरणाचा फटका विदर्भातील काही जागेवर बसला होता. यात उमरेडचा सुध्दा समावेश होता. त्यामुळे काँग्रेसच्या तिकीटावर निवडून आलेले राजू पारवे हे अपघाती आमदार ठरले. निवडून आल्यानंतर त्यांनी 'एकला चलो रे'ची वाट धरली. त्यामुळे काँग्रेसचे नेते व कार्यतर्ते त्यांच्यावर नाराज होते.

पुन्हा निवडून येण्याची शक्यता वाटत नसल्याने त्यांनी लोकसभा निवडणुकीच्या तोंडावर शिंदे सेनेत प्रवेश केला. सहा महिन्यात तीन पक्ष बदलण्याचा रेकॉर्ड त्यांनी केला. सुधीर पारवे निवडून आल्यास विधान परिषद मिळणार नाही, अशी शंका त्यांना होती. त्यामुळे अपक्ष उमेदवाराच्या ‘कढई‘त त्यांनीच तेल ओतल्याचा आरोपही भाजप कार्यकर्त्यांचा आहे.