Nagpur News, 29 Nov : राज्यातील निवडणुका पार पडल्या असून या निवडणुकीत महायुतीला भरघोस यश मिळालं आहे. त्यामुळे आता राज्यात महायुतीकडून सत्ता स्थापनेच्या जोरदार हालचाली सुरू आहेत. शिवाय शिवसेना शिंदे गटाचे प्रमुख एकनाथ शिंदे (Eknath Shinde) यांनी मुख्यमंत्रि‍पदावरील दावा सोडला आहे.
त्यामुळे आता देवेंद्र फडणवीस (Devendra Fadnavis) हेच महायुती सरकारचे नवे मुख्यमंत्री होणार असल्याचं जवळपास निश्चित झालं आहे. अशातच आता फडणवीस यांचे राजकीय कट्टर विरोधक असलेले काँग्रेस नेते विजय वडेट्टीवार यांनी फडणवीस यांच्या संभाव्य मुख्यमंत्री पदाच्या निवडीबद्दल शुभेच्छा दिल्या आहेत.
या शुभेच्छा देताना त्यांनी फडणवीसांना टोला देखील लगावला आहे. वडेट्टीवार (Vijay Wadettiwar) म्हणाले, देवेंद्र फडणवीस मुख्यमंत्री होत आहेत याचा आनंद आहे. त्यांनी आता आपला बॅकलॉक भरून काढावा. शिवाय आता त्यांना कुबड्यांची गरज नाही, उलट कुबड्या त्यांच्यावर अवलंबून आहेत, असं म्हणत त्यांनी एकनाथ शिंदे आणि अजित पवारांना टोला लगावला.
तर आता फडणवीसांना कोणी थांबवु शकत नाही. विदर्भाचं लेकरू म्हणून विविध क्षेत्रात विदर्भाला न्याय मिळेल अशी अपेक्षा आहे. मध्यंतरी त्यांच्यावर ते बदला घेण्याचं राजकारण करतात असा ठपका होता. मात्र, या कार्यकाळात तो ठपका पुसून निघेल अशी अपेक्षा आहे. कारण राजकारणात वैचारिक लढाई असावी, वैयक्तिक कोणी कोणाचं वैरी नाही.
त्यामुळे त्यांच्या संदर्भात महाराष्ट्रात जी काही प्रतिमा जनतेमध्ये तयार झाली होती ती पुसून निघेल आणि खऱ्या अर्थाने महाराष्ट्राचे मुख्यमंत्री म्हणून ते छाप पाडतील, असं वडेट्टीवार म्हणाले. दरम्यान, यावेळी त्यांनी मुख्यमंत्री एकनाथ शिंदे यांचा अमित शाह यांच्या बैठकीनंतरचा जो नाराज असल्याचा फोटो व्हायरल होत आहे. त्यावर प्रतिक्रिया दिली.
ते म्हणाले, "स्वाभाविक मुख्यमंत्री राहिलेल्या एकनाथ शिंदेंना सत्ता मिळूनही सत्तेतील सर्वोच्च खुर्ची मिळत नसल्याने चेहरा पडल्याचं दिसत आहे. तसंच आता एकनाथ शिंदे आणि अजित पवारांची उपयुक्तता संपली असावी. त्यामुळे मोदी-फडणवीस यांच्या आशीर्वादाने या दोघांना रहावे लागणार आहे. काही दिलं नाही तरी त्यांना गप्प बसावं लागेल."
दरम्यान, यावेळी त्यांनी काँग्रेसच्या राज्यातील पराभवामुळे 'नाना पटोले हटाव' मोहीमेच्या चर्चेवरही भाष्य केलं. ते म्हणाले, "मी त्या मोहिमेत नाही, व्यक्तिशः काही मोहीम राबवण्याची आवश्यकता नाही, काही चुका होत असतात, त्या मोहिमेचा मी भागीदार नाही, राज्यात मोठा पराजय होत असेल तर त्यांचं मंथन होणं गरजेचं आहे."
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.