Vijay Wadettiwar : महायुतीवर तुटून पडणाऱ्या वडेट्टीवारांच्यांच अडचणी वाढल्या; उच्च न्यायालयाची नोटीस

Nagpur News : काँग्रेसचे नेते व विधानसभेचे माजी विरोधी पक्षनेते विजय वडेट्टीवार यांनी निवडणुकीसाठी दाखल केलेल्या शपथपत्रावर आक्षेप नोंदवत त्यांची आमदारकी रद्द करण्यासाठी याचिका दाखल करण्यात आली होती. वडेट्टीवार यांनी दाखल केलेले शपथपत्र अवैध असून त्यांची आमदारकी रद्द करण्यात यावी, अशी विनंती याचिकेतून करण्यात आली आहे. वडेट्टीवार यांना या प्रकरणी मुंबई उच्च न्यायालयाच्या नागपूर खंडपीठाने नोटीस बजावली आहे. त्यामुळे येत्या काळात त्यांच्या अडचणीत वाढ होण्याची शक्यता आहे.

ब्रम्हपुरीचे काँग्रेस (Congress) आमदार विजय वडेट्टीवार यांनी निवडणुकीसाठी दाखल केलेल्या शपथपत्रावर आक्षेप नोंदवत त्यांची आमदारकी रद्द करण्यासाठी स्वाभिमानी पक्षाचे उमेदवार नारायण जांभुळे यांनी याचिका दाखल केली आहे. वडेट्टीवार यांनी दाखल केलेले शपथपत्र अवैध असून त्यांची आमदारकी रद्द करण्यात यावी, अशी विनंती याचिकेतून करण्यात आली आहे.

या याचिकेवर मुंबई उच्च न्यायालयाच्या नागपूर खंडपीठाचे न्या. प्रवीण पाटील यांच्या खंडपीठासमक्ष सुनावणी झाली आणि न्यायालयाने त्यांना नोटीस बजावत पुढील सुनावणीत भूमिका स्पष्ट करण्याचे निर्देश दिले आहेत. ब्रम्हपुरी विधानसभा मतदारसंघ हा महाराष्ट्र विधानसभेतील महत्वपूर्ण मतदारसंघांपैकी एक आहे. गडचिरोली-चिमूर लोकसभा मतदारसंघाचा भाग आहे

काँग्रेसचे विद्यमान आमदार विजय वडेट्टीवार (Vijay Wadettivar ) यांनी ब्रम्हपुरी मतदारसंघात तिसऱ्यांदा विजय प्राप्त केला. याच मतदारसंघातून स्वाभिमानी पक्षाचे उमेदवार म्हणून नारायण जांभुळे उमेदवार होते. निव़़डणुकीच्या दरम्यानही जांभुळे यांनी वडेट्टीवार यांच्या शपथपत्रावर आक्षेप नोंदविला होता.

वडेट्टीवार यांनी ज्या मुद्रांकावर शपथपत्र सादर केले, तो त्यांच्या पत्नीने स्वतःच्या नावावर खरेदी केला आहे. वडेट्टीवार त्यावर शपथपत्र सादर करू शकत नाहीत. त्यामुळे मुद्रांक कायद्यानुसार त्यांचे प्रतिज्ञापत्र अवैध आहे. हा मुद्रांक पेपर करारनाम्यासाठी खरेदी करण्यात आला आहे. मात्र, त्याचा उपयोग शपथपत्रासाठी करण्यात आला. त्यामुळे वडेट्टीवार यांची निवडणूक अवैध ठरवून रद्द करण्यात यावी, अशी विनंती या याचिकेद्वारे केली होती.

निवडणूक संपल्यावर याचिका दाखल करण्याचा दिला होता सल्ला

विधानसभा निवडणुकीच्या दरम्यान दाखल याचिकेनंतर याचिकाकर्त्याला न्यायालयाने फटकारले होते. संविधानातील कलम 329 नुसार न्यायालय निवडणूक प्रक्रिया सुरू झाल्यावर त्यात हस्तक्षेप करू शकत नाही. उच्च न्यायालयाने याचिकाकर्त्याला निवडणूक संपल्यावर याचिका दाखल करण्याचा सल्ला देत ही याचिका फेटाळली होती. याचिकाकर्त्याने निवडणूक संपल्यावर आता याप्रकरणात निवडणूक याचिका दाखल केली आहे.

पुढील सुनावणीकडे सर्वांचे लक्ष

या प्रकरणावरील सुनावणीनंतर वडेट्टीवार यांना मुंबई उच्च न्यायालयाच्या नागपूर खंडपीठाने नोटीस बजावली आहे. त्यामुळे आता येत्या काळात होत असलेल्या सुनावणीकडे सर्वांचे लक्ष लागले आहे.

(25 वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)