Devendra Fadnavis : सिद्दीकी प्रकरणावरून सत्तेतून पायउतार होण्याचं पवारांचं आव्हान; फडणवीस म्हणाले, “त्यांना फक्त...”

बाबा सिद्दीकी यांच्याशी माझी निकटची मैत्री होती. त्यांच्या जाण्यानं आम्हाला धक्का बसला आहे. या घटनेतील दोन आरोपींना पकडण्यात आलं आहे, अशी माहिती उपमुख्यमंत्री तथा गृहमंत्री देवेंद्र फडणवीस यांनी दिली आहे. सिद्दीकी यांच्या प्रकरणावरून राष्ट्रवादी काँग्रसचे ( शरदचंद्र पवार ) अध्यक्ष शरद पवार यांनी सरकारवर टीका केली होती. यालाही फडणवीस यांनी उत्तर दिलं आहे. ते गोंदियात प्रसारमाध्यमांशी संवाद साधत होते.

देवेंद्र फडणवीस ( Devendra Fadnavis ) म्हणाले, “ही दुर्दैवी आणि अतिशय गंभीर अशा प्रकारची घटना आहे. सिद्दीकी यांच्याशी माझी निकटची मैत्री होती. या घटनेमुळे आम्हाला धक्का बसला आहे.

या घटनेतील दोन आरोप पकडलेले आहेत. त्यांची चौकशी सुरू आहे. या प्रकरणात काही धागेदोरे आणि काही अगल्स लक्षात येत आहेत. पण, त्याबाबत लगेच बोलणं योग्य नाही. यासंदर्भात पोलिस अधिक माहिती देतील.”

याप्रकरणाची जबाबदारी स्वीकारून सत्ताधाऱ्यांनी पायउतार होण्याची गरज आहे, असं आव्हान शरद पवार ( Sharad Pawar ) यांनी दिलं होतं. याबद्दल प्रश्न विचारल्यावर देवेंद्र फडणवीस यांनी म्हटलं, “त्यांना फक्त सत्ता पाहिजे. इतकी गंभीर घटना झाल्यानंतरही त्यांच्या नजरेसमोर फक्त खुर्ची आहे. आमच्या नजरेसमोर फक्त महाराष्ट्र आहे. आम्हाला महाराष्ट्राकडे पाहायचे आहे. महाराष्ट्राचा विकास आणि सुरक्षा पाहायची आहे. त्यांनी खुर्चीकडे बघावे, त्यांना बोलायचे आहेत, ते त्यांनी बोलावे.”

दरम्यान, सिद्दीकी हत्या प्रकरणात तीन आरोपींची ओळख पटवण्यात आली आहे. यातील तीघांची नावे करनैल सिंह, धर्मराज कश्यप, शिवकुमार गौतम अशी आहेत. करनैल सिंह हरियाणा आणि कश्यप, गौतम हे उत्तर प्रदेशातील रहिवाशी आहेत. करनैल सिंह, कश्यप यांना अटक करण्यात आली आहे. तर शिवकुमार हा फरार आहे.