EVM News : ईव्हीएमचे सील तुटले की तोडले? प्रचंड गोंधळ, तणावग्रस्त परिस्थितीत अधिकाऱ्याची विकेट

Gondia EVM News : गोंदिया जिल्ह्यातील सालेकसा तहसील कार्यालयातील स्ट्रॉंग रूममधील एका ईव्हीएमचे सील तोडल्यामुळे खळबळ उडाली आहे. सर्वपक्षीय नेत्यांनी याचा विरोध करण्यासाठी तहसील कार्यालयाला घेराव घातल्याने तणावाची परिस्थिती निर्माण झाली होती. हे आंदोलन चिघळत असल्याचे बघून प्रशासनाने तडकाफडकी तहसीलदार मोनिका कांबळे यांना निवडणूक निर्णय अधिकारी पदावरून हटवले आहे. त्यांच्याऐवजी आता अर्जुनी मोरगावचे तहसीलदार अनिरुद्ध कांबळे यांची नियुक्ती करण्यात आली आहे.

नगरपरिषदेचे मतदान आटोपल्यानंतर तहसील कार्यालयात ईव्हीएमचे सील तुटले असल्याचे आढळले. याची माहिती उमेदवार, त्यांचे समर्थक व शहरवासींना होताच बुधवारी (ता. ३) त्यांनी तहसील कार्यालयात एकच गोंधळ घातला. संबंधित अधिकाऱ्यांवर त्यांनी आरोपाच्या फैरी झाडल्या.

तहसील कार्यालयाला छावणीचे रूप प्राप्त झाले होते. आंदोलनकर्त्यांची समजूत काढण्यात आली. मात्र, ते त्यांच्या भूमिकेवर ठाम होते. रात्री उशिरापर्यंत गोंधळ सुरूच होता. गुरुवारीदेखील सकाळपासून तणावपूर्ण वातावरण होते. तथापि, शहरात सर्वपक्षीय नेते तसेच नागरिकांनी निवडणूक आयोग व प्रशासनाविरोधात घोषणाबाजी करत शहरातील मुख्य चौकापासून ते तहसील कार्यालयापर्यंत मोर्चा काढला. अधिकाऱ्यांना घेराव घातला.

या प्रकरणाची निवडणूक आयोगाकडून (Election Commission) पारदर्शक व निःपक्ष चौकशी करावी, देवरीच्या उपविभागीय अधिकारी कविता गायकवाड, निवडणूक निर्णय अधिकारी मोनिका कांबळे, सहायक निवडणूक अधिकारी प्रमोद कांबळे यांच्या मोबाइल फोन डेटाची तपासणी करावी, या तिन्ही अधिकाऱ्यांना निलंबित करावे, अशी मागणी आंदोलकांनी केली.

यावेळी मोठा पोलिस बंदोबस्त ठेवण्यात आला होता. सद्यःस्थितीत सालेकसा येथे तणावपूर्ण वातावरण असून, पोलिस छावणीचे रूप प्राप्त झाले आहे. या प्रकरणातील दोषींवर तत्काळ निलंबनाची कारवाई करावी, निवडणूक प्रक्रियेत सहभागी अधिकाऱ्यांच्या मोबाइल फोन डेटाची तपासणी करावी, सहायक निवडणूक अधिकारी प्रमोद कांबळे यांच्यावर फौजदारी गुन्हा दाखल करावा, आदी मागण्या आंदोलकांनी केल्या आहेत.