Grampanchayat Election : हंसराज अहिरांच्या प्रयत्नांनंतरही सावळीमध्ये भाजपचा दारूण पराभव

Grampanchayat Election Result : राज्यातील ग्रामपंचायतींचा निकाल आज जाहीर होत आहे. त्यामध्ये अनेक धक्कादायक निकाल हाती येत आहेत. यवतमाळच्या आर्णी तालुक्यातील सर्वात मोठी ग्रामपंचायत म्हणून ओळख असलेल्या सावळी सदोबा येथे अकरा सदस्य पदासाठी आणि एक सरपंचपादासाठी चुरशीची लढत झाली होती. मात्र, निकाल एकतर्फी लागल्याने भाजपच्या गोठ्यात सन्नाटा पसरल्याचे चित्र पाहायला मिळत आहे.

आगामी जिल्हा परिषद व पंचायत समिती निवडणूक डोळ्यासमोर ठेवून ग्रामपंचायत निवडणुकीकडे पाहिले जाते. यावेळी सरपंच थेट जनतेतून निवडून येणार असल्याने निवडणुकीत चांगलीच चुरस निर्माण झाली होती. भाजपचे माजी केंद्रीय गृहराज्यमंत्री तथा ओबीसी सेलचे राष्ट्रीय अध्यक्ष हंसराज अहीर (hansraj ahir) आणि भाजपचे आमदार संदिप धुर्वे यांनी लक्ष घातल्यानंतरही भाजपचा दारून पराभव झाला.

आतापर्यंत लागलेल्या निकालामध्ये भाजपावर मात करत सरपंचपदाचे कॉंग्रेसचे नेते बाळासाहेब शिंदे (Balasaheb Shinde) प्रचंड मताने विजयी झाले. कॉंग्रेसच्या ११ पैकी ११ सदस्य निवडून आले. निकाल एकतर्फी लागल्याने भाजपामध्ये चांगलाच सन्नाटा पसरला आहे. कॉंग्रेसने एकुण ४५७ जागांवर विजय मिळवला आहे. मात्र, कॉंग्रेसची परिस्थिती अपक्ष पेक्ष वाईट असल्याचे दिसून आले.

दरम्यान, परळी विधानसभा मतदारसंघ तसेच बीड जिल्ह्यात ग्रामपंचायत निवडणुकीत राष्ट्रवादी समर्थक कार्यकर्त्यांनी मोठ्या प्रमाणावर ग्रामपंचायत निवडणुकीत यश मिळवले असून अनेक ठिकाणी आघाडीवर आहेत. सर्व विजयी सरपंच व उमेदवारांचे अभिनंदन, गुलाल आपलाच असा दावा करणारे ट्विट धनंजय मुंडे यांनी केले आहे.