Sameer Umap : अनिल देशमुखांच्या काटोल मतदारसंघात आता फलकावरून वाद!

Sameer Umap News : माजी गृहमंत्री अनिल देशमुख यांच्या पेनड्राईव्ह वरून काटोल-नरखेड विधानसभा मतदारसंघात सलील आणि आशिष देशमुख या चुलत भावांमध्ये सुरू असलेला शाब्दिक वॉर आणि उमेदवारीवरून दावे-प्रतिदावे सुरू असताना भाजप नेत्यांच्या अभिनंदनाच्या फलाकास विद्रूप केल्याने नव्या वादाला तोंड फुटले आहे.

दुसऱ्या फळीतील राजकीय कार्यकर्त्यांच्या ‘सतरंजी' संघटनेचे सदस्य, जिल्हा परिषद सदस्य समीर उमप यांनी रस्ते व पुलाच्य बांधकामासाठी 64 कोटी रुपये मंजूर केल्याने मोठा फलका मतदारसंघात लावला आहे. मात्र, बॅनरवरील उमप यांचा फोटो विद्रूप करण्यात आला आहे. फोटो विरोधकांनी विद्रुप केल्याचा आरोप उपम यांनी केला आहे.

या फलकावर मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्यासह भाजपचे प्रदेशाध्यक्ष चंद्रशेखर बावनकुळे, आशिष देशमुख, चरणसिंग ठाकूर यांचे फोटे लावले आहेत. सौजन्य म्हणून समीर उमप यांचा या फलकावर फोटो आहे.

आमचे लोकप्रतिनिधी मतदारसंघाच्या विकासाकडे लक्ष देत नाही. काहीच कामे करीत नाही. अनेक वर्षे सरकारमध्ये आणि मंत्रिमंडळात असतानाही मतदारसंघाचा विकास करून शकले नाही. त्यामुळे भाजपच्या कार्यकर्त्यांनी विकासासाठी निधी देण्याची मागणी केली होती. महायुती सरकारने भाजपच्या कार्यकर्त्यांची मागणीची दखल घेतली.

त्यानुसार मतदारसंघाच्या विकासासाठी ६४ कोटी रुपये दिले. त्याकरिता आभार व्यक्त करण्यासाठी संपूर्ण मतदारसंघात अभिनंदनाचे बॅनर, पोस्टर लावले आहेत. मात्र शरदचंद्र पवार राष्ट्रवादी काँग्रेसच्या कार्यकर्त्यांना ते रुचले नाही. त्यामुळे माझा फोटो विद्रुप केल्याचे समीर उमप यांचे म्हणणे आहे.

येणाऱ्या विधानसभेच्या निवडणुकीत जनता या धडा शिकवल्याशिवाय राहणार नाही असा इशाराही उमप यांनी दिला आहे. सतरंजी संघटनेत सर्व पक्षाचे राजकीय नेत्यांचा समावेश आहे. त्यांचा विरोध अनिल देशमुख यांना आहे. त्यांच्या विरोधात उभ्या राहणार उमेदवाराला सहकार्य करण्याची भूमिका त्यांनी घेतली आहे. भाजपने संघटनेने आपसात ठरवून एका उमेदवाराचे नाव द्या असे त्यांना सांगितले आहे. भाजपचा उमेदवार ठरायचा असला तरी आतापासूनच यासाठी स्पर्धा सुरू आहे.

(Edited by Roshan More)