Nagpur Graduate Result : नागपूरमध्ये भाजपला धक्का : काँग्रेसचे अभिजीत वंजारी पहिल्या फेरीत 7 ते 8 हजार मतांनी आघाडीवर, भाजपचे कोहळे दुसऱ्या, तर कराळे मास्तर तिसऱ्या क्रमांकावर...

Nagpur, 27 October : नागपूर पदवीधर मतदारसंघाच्या निवडणुकीच्या मतमोजणीच्या ८४ हजार मतांची मोजणी पहिल्या फेरीत करण्यात आली. या मतमोजणीच्या ट्रेंडमध्ये काँग्रेसचे ॲड. अभिजित वंजारी यांनी ७ ते ८ हजार मतांची आघाडी घेतली आहे. मात्र, या मतांमध्ये तब्बल दहा ते बारा हजार मते अवैध ठरली आहेत.

नागपूर पदवीधर मतदारसंघाच्या मतमोजणीस आज दुपारी एक वाजता सुरुवात झाली. पहिल्या फेरीत ८४ टेबलवर ८४ हजार मतांची मोजणी सुरू होती. मतमोजणीत सुरुवातीपासून अभिजित वंजारी यांनी आघाडी घेतली होती.

भारतीय जनता पक्षाचे सुधाकर कोहळे काही टेबलवर आघाडीवर होते. याशिवाय अपक्ष उमेदवार नितेश कराळे यांनीही तिसऱ्या क्रमांकाची मते घेतली आहेत. त्यामुळे सामना अभिजित वंजारी, सुधाकर कोहळे आणि नितेश कराळे यांच्यात रंगला आहे. अद्याप ८४ हजार मतांची मोजणी झालेली नाही. ती लवकरच सुरू होणार आहे.

दुसऱ्या पसंतीची मते मोजावी लागणार

सध्याच्या मतमोजणीतील कल लक्षात घेता निवडणुकीचा निर्णय दुसऱ्या पसंती क्रमावर होणार आहे, त्यामुळे मतमोजणीचा अंतिम निकाल लागण्यास बराच उशीर होण्याची शक्यता आहे.

दहा हजार मते अवैध

पदवीधरांच्या निवडणुकीच्या मतमोजणीत मते अवैध ठरण्याचे प्रमाण मोठ्या प्रमाणात असल्याचे दिसून येत आहे. ८४ हजार मतांच्या मोजणीत तब्बल दहा हजारांवर मते अवैध ठरली आहेत.

कराळे मास्तर सुसाट

पदवीधर निवडणुकीच्या मतमोजणीत अपक्ष असलेले नीतेश कराळे यांनी सुसाट वाटचाल केली आहे. ८४ हजाराच्या मतमोजणीत कराळे गुरुजींनी तिसऱ्या क्रमांकावर झेप घेतल्याचे दिसून आले आहे.