NDCC Loan waiver : शेतकऱ्यांना कर्जमाफी मिळणार; पण, घोटाळ्यात अडकलेल्या नागपूर जिल्हा बँकेच्या कर्जदारांचे काय होणार?

Nagpur News : नागपूर : येत्या जून महिन्यात राज्य शासनामार्फत शेतकरी कर्जमाफीची घोषणा होणार आहे. आगामी अर्थसंकल्पात यासाठी आर्थिक तरदूत केली जाणार आहे. तसा शब्द मुख्यमंत्र्यांनी दिला आहे. कर्जमाफीसाठी विविध बँकांकडून थकबाकीची आकडेवारी मागवण्यात आली आहे. शेतकऱ्यांनाही कागतपत्रे सादर करण्याच्या सूचना देण्यात आल्या आहेत. मात्र नागपूर जिल्हा मध्यवर्ती सहकारी बँकेतून कर्ज उचलणाऱ्यांना कर्जमाफी मिळणार की नाही असा प्रश्न निर्माण झाला आहे.

नागपूर जिल्हा सहकार बँकेत 1200 कोटी रुपयांचा घोटाळा झाला आहे. याच बँकेतील घोटाळ्या प्रकरणी माजी मंत्री व काँग्रेसचे नेते सुनील केदार यांना न्यायालयाने दोषी ठरवले आहे. त्यामुळे त्यांना विधानसभेची निवडणूक लढता आली नाही. या बँकेवर सध्या प्रशासक आहे. असे असले तरी नागपूर जिल्हा मध्यवर्ती बँकेमार्फतच सर्वाधिक कृषी कर्जाचे वाटप केले जाते. गावखेड्यातील शेतकऱ्यांना हीच एकमेव बँक ठाऊक आहे.

सहकार खात्याने अनेकांना लुबाडले आहे. नागपूर जिल्ह्य बँकेत झालेला घोटाळा बघता कर्जमाफी देताना याचा विचार केला जाणार असल्याचे राज्याचे महसूलमंत्री चंद्रशेखर बावनकुळे यांनी सांगितले. हे बघता आता या बँकेतून कृषी कर्जाची उचल करणाऱ्या शेतकऱ्यांना कर्जमाफी मिळणार की नाही याबाबत शंका निर्माण झाली आहे. नागपूरमध्ये माध्यमांशी बोलताना बावनकुळे म्हणाले, सहकार कायद्यावर बोट ठेवून अनेक शेतकऱ्यांची पिळवणूक झाली आहे.

गरजवंत शेतकऱ्यांना कर्जमाफी झाली पाहिजे हे सरकारचे धोरण आहे. एकाही शेतकऱ्याने आत्महत्या करू नये यासाठी कर्जमाफी दिली जाणार आहे. यासाठी आम्ही सर्व शेतकऱ्यांकडून याद्या मागवत आहोत. सोबतच सहकार खात्याकडून कोणी लुटले गेले आहे याचीही पडताळणी केली जात आहे.

नागपूर जिल्हा बँकेतील 1200 कोटी रुपयांचा घोटाळा असल्याने कर्जमाफी देतानाही याचा विचार केला जाणार आहे असे चंद्रशेखर बावनकुळे म्हणाले. हे बघता नागपूर जिल्हा मध्यवर्ती सहकारी बँकेतून कर्ज घेणाऱ्या शेतकऱ्यांबाबत सरकार वेगळा विचार करीत असल्याचे दिसून येते. त्यामुळे या बँकेचे कर्जदार शेतकरी साशंक झाले आहेत.