Nagpur Mahayuti News: नागपूर ग्रामीणमध्ये राजकीय घडामोडींना वेग; भाजपला सोडून शिवसेना-राष्ट्रवादीच्या वाटाघाटी

Nagpur News : नगरपालिका आणि नगरपंचायतीच्या निवडणुका जाहीर झाल्या आहेत. त्यात आता महायुती होण्याची शक्यता नाही. या दोन्ही निवडणुका तुम्हाला लढवायच्या आहेत. याचे नियोजन तुम्हीच करा असे स्पष्टपणे उपमुख्यमंत्री अजित पवारांनी (Ajit Pawar) राष्ट्रवादी काँग्रेसच्या पदाधिकाऱ्यांना सांगून टाकले आहे. त्यामुळे राष्ट्रवादीच्या स्थानिक नेत्यांना आता शिवसेनेकडून आशा आहे.

दोन्ही पक्षाच्या काही नेत्यांनी एकमेकांची भेट घेऊन बैठक घेतली. यात भाजप विचारत नसेल तर आपली युती कायम राहील असे ठरवण्यात आले. या युतीत आणखी कोणाला घ्यायचे याचा निर्णय घेण्यासाठी रविवारी (ता.9) पुन्हा बैठक घेण्यात येणार आहे.

नगरपालिका आणि नगर पंचायतीच्या निवडणुकीवर विचारविनिमय करण्यासाठी शिवसेनेचे आमदार कृपाल तुमाने यांच्या कार्यालयात एक छोटेखानी बैठक झाली. या बैठकीला राष्ट्रवादी काँग्रेसचे जिल्हाध्यक्ष राजाभाऊ टाकसाळे, शहर अध्यक्ष अनिल अहीरकर, शहराचे कार्याध्यक्ष श्रीकांत शिवणकर, शिवसेनेचे जिल्हा प्रमुख सतीश इटकेलवार, दुसरे जिल्हाध्यक्ष विनोद सातंगे, चंद्रहास राऊत, अमित कातुरे आदी उपस्थित होते.

ग्रामीण भागातील निवडणुकीत महायुती होण्याची शक्यता नाही. आम्हाला भाजपशी (BJP) युती तोडायची नाही. त्यांच्याही सोबत चर्चा करणार आहोत. मात्र, तिकडून प्रतिसाद मिळत नसेल तर आम्हाला आमची तयारी करावी लागणार असल्याचे सेना आणि राष्ट्रवादी काँग्रेसच्या पदाधिकाऱ्यांचे म्हणणे आहे.

आजची बैठक प्राथमिक होती. आमच्यासोबत येण्याची ज्यांची इच्छा त्या सर्वांना बोलावण्यात येईल. त्यात जे काही ठरेल त्यानुसार निवडणुकीला युती म्हणून आम्ही सामोरे जाऊ असे सांगण्यात आले.

दुसरीकडे काँग्रेसतर्फे महाविकास आघाडीबाबत कुठलाच प्रतिसाद दिला जात नाही. आजवर एकही चर्चा आपसात झालेली नाही. पवारांच्या राष्ट्रवादी काँग्रेसचे जिल्हाध्यक्ष प्रवीण कुंटे यांनी काँग्रेसवर दगाबाजीचा आरोप केला आहे. मागील जिल्हा परिषद आणि विधानसभेच्या निवडणुकीत बंडखोर उभे केले. त्यानंतर सन्मानाने त्यांना पक्षात घेतले. हे बघता बंडखोरी काँग्रेस पुरस्कृतच होती असाही आरोप कुंटे पाटील यांनी केला आहे.

शरद पवारांच्या राष्ट्रवादी काँग्रेसने विविध सामाजिक संघटना आणि छोट्या छोट्या पक्षांसोबत मोट बांधणे सुरू केले आहे. इच्छुकांकडून उमेदवारी अर्जही घेतले जात आहे. दुसरीकडे काँग्रेसने कोणाची वाट न बघता इच्छुक उमेदवारांच्या मुलाखती शुक्रवारी आटोपल्या. या मुलाखतीला पक्षाच्यावतीने ठरवलेल्या निवड मंडळालाही बोलावण्यात आले नव्हते.

माजी मंत्री सुनील केदार यांचेच समर्थक यात उपस्थित होते. याची तक्रार झाल्यानंतर प्रदेशाध्यक्षांनी ही बैठकच अवैध ठरवली आहे. हा सर्व ड्रामा बघता काँग्रेस आणि भाजप आघाडी आणि महायुतीमध्ये इतरांना घेण्यास इच्छुक नसल्याचे स्पष्ट होते.